Coronaqarnerani ikiorsiissutit septembarimi atorunnaassasut
Naalakkersuisut coronaqarnerani inuussutissarsiuteqartunut ajornartooqqasunut ikiorsiissutaat septembarip naanerani atorunnaassapput.
Tamanna aningaasaqarnermut naalakkersuisup, Vittus Qujaukitsup (NQ) aappaagumut aningaasanut inatsimmut missingersuummik ullumi siusinnerusukkut saqqummersitsinermini aamma erseqqissaatigaa.
Maanna illuatungeriit tassa aningaasaqarnermut akileraartarnermut ataatsimiititaliap naalakkersuisullu ataatsimoorlutik susoqarnissaanik misissuissapput.
Inuussutissarsiortunut ikiorsiissutit pioreersut immaqa sivitsorneqassapput imaluunnit naleqqussarneqassapput. Tamannali illuatungeriit piffissami aggersumi misissussagaat, inuussutissaqarnermut naalakkersuisoqarfik mailikkut KNR-imut paasissutissiivoq.
Coronap ilungersunartorsiortitsinera aningaasanut inatsimmi
Inuussutissarsiuteqartunut ikiorsiissutit suliffeqarfinnut aningaasaqarnikkut coronap nunarsuaq tamakkerlugu tunillaassuunnerani eqqugaasunut ikiorsiissutissatut pilersinneqarput.
Takornariaqarnermik suliaqartut nunatsinni nunanilu allani killilersuinerit pissutigalugit angallanneq nalinginnaasoq unimmat ilaatigut eqqugaangaatsiarput.
AAMMA ATUARUK Vittus Qujaukitsoq: Aappaagu amigartooruteqarnissaq pinngitsoortinneqarsinnaanngilaq
Coronap ilungersunartorsiortitsinera nunatsinni ataatsimut isigalugu aningaasatigut sunniuteqarpoq. Tamanna aningaasanut inatsisissatut siunnersuummi ullumi saqqummiunneqartumi aamma malugineqarsinnaavoq.
Uanilu coronap ilungersunartorsiortitsinera pissutigalugu aningaasartuutit maannamut 595 millionit koruuniusut saqqummiunneqarpoq.
Aningaasartuutit taamaaginnarnissaannut inuussutissarsiortunut ikiorsiissutit sivitsorneqannginnissaat pisariaqartoq, Qujaukitsup ataasinngornermi erseqqissaatigaa.
Naalakkersuisut ukiup affaata ingerlanerani ikiorsiissutit qassiiusut saqqummersippaat.
AAMMA ATUARUK Inuussutissarsiornermut ikiorsiissutit nutaat takornarialerisunut tapersiissasoq
Takornariaqarnermik suliaqartunut sammisut ikiorsiissutit juunip qaammataani ilaatigut saqqummiunneqarput.
Akunnittarfiit takornariartitsinissamillu suliaqartut unnuiniartunut takornariarniartunullu Covid-19-imik neqerooruteqarsinnaalernissaat aamma periarfissanngortinneqarpoq.
Inuussutissarsiuteqartunulli ikiorsiissutit novembarip ulluisa 30-anni tunngaviusumik qaangiuttussaapput.