Borgmesteri Narsami aallaasersortoqarnera pillugu: Tupaqqallutalu attortisimavugut
Narsap heliportiani pingasunngornermi ualikkut aallaasersortoqarmat inuit marluk eqqorneqarput pingajullu ajoquserlutik.
Inuit marluk aallaammik eqqorneqartut inuunerminnik navianartorsiunngillat.
Pinerluttoq politiit nalunaaqutaq 16.50 nalunaarfigineqarneranit akunnerup affaa qaangiuttoq tigusarineqartoq Kalaallit Nunaanni Politiit ippassaq paasissutissiipput.
Pisoq alianarluinnartoq, Kommune Kujallermi borgmesteri, Stine Egede (IA) KNR-imut oqarpoq.
- Pisoq attortinnartorujussuuvoq. Pisoqarnera ippassaq arferngup qeqqata missaani tusarparput, tamattalu tupaqaagut. Sakkortuvoq. Aamma aallaqqaammut susoqarnera ilisimaneqannginnera pissutigalugu, Stine Egede oqarpoq.
Kikkut tamarmik nalaatsinerlunnermik ikiueqqaarfigineqarsinnaasut
Borgmesteri ippassaq aallaasersortoqarnerani Narsamiippoq.
Taassuma upalungaarsimaneq ippassaq unnukkut aallartinneqartoq, Narsamilu innuttaasut katersortarfimmut katerissinnaatinneqartut paasissutissiissutigaa.
Ajornartoornermi upalungaarsimasut ikiueqqaarfigineqarnissamut sunik periarfissaqarneranik innuttaasunut paasissutissiipput.
- Illoqarfimmi katersortarfik erngertumik ammarparput, taamaalilluta pisoq pillugu oqaluttuarsinnaalluta. Inuppassuit tassunga takkupput. Aamma qulimiguulimmi sulisunit pisoq pillugu oqaluttuartoqarpoq, innuttaasut taamaalillutik inunnit eqqortunit paasissutissiiffigineqarlutik, Stine Egede oqarpoq.
Mittarfeqarfimmi pisortaanerup, Henrik Estrupip oqarnera naapertorlugu Narsami heliportimi sulisut marluk aallaasersortoqarnerani najuupput, sulisullu aappaa igalaamerngit aseqqukuinik eqqorneqarpoq, taannalu Narsap napparsimmaviani passunneqarluni.
Narsami aallaasersortoqarnera pillugu tusatsiakkat sukkasuumik siammarterneqarmat paasissutissat eqqortut erngertumik paasissutissiissutigineqartut borgmesterip ilanngullugu oqaatigaa.
Politiit suliamik misissuileruttorput, taamaammallu piffissami matumani allamik paasissutissaateqaratik. Taamaammat aallaasersortoqarneranut suna pissutaanersoq oqaatigineqarsinnaanngilaq.
Stine Egedep oqarnera naapertorlugu Air Greenland sulisumilu nalaatsinerlunnermik ualungaarsimasunik aallartitaqarpoq, Narsamilu napparsimmavik napparsimmavimmi sulisunut nalaatsinerlunnermik ikiuinermik aamma isumaginnilluni.
- Kommunilu innuttaasut sinnerinut ikiueqqaarfigineqarnissamik pisariaqartitsisunut tamanut aamma piareersimavoq, Stine Egede oqarpoq.
Isiginnittut alapernaatsut
Stine Egede Narsap Atuarfianut meeqqanik aallaasersortoqarnera pillugu oqaloqatiginnikkiartorluni ullaaq pulaarpoq.
- Susoqarsimanera sunalu maluginiassaneraat oqaatigissallugu pingaaruteqarpoq, taanna oqarpoq.
Borgmesterip oqarnera naapertorlugu aallaasersortoqarneranut isiginnittut arlaqarput, taakkulu pisoqarnerata nalaani isiginnaarput.
- Pisoqarnerani pinerluffiusumit pisut tamakkua qimallugit angerlartoqartarnissaa meeqqanut oqaatigisariaqarpakka, Stine Egede oqarpoq.
Aallaasersortoqarnerata oqaluuserinissaa iliuuseqarfiginissaalu pingaaruteqarpoq, borgmesteri oqarpoq.
Pingaartumik Narsami innuttaasut arlallit 1990-imi ukiortaap unnuaani inuit arfineq-marluk aallaasersortoqarnerani toqutaanerannik eqqaamasaqarnerat pissutigalugu, Stine Egede oqarpoq.
- Narsami toqutsisoqarsimaneranik oqaluttuassartaqarnera eqqaamassavarput. Maani illoqarfimmi tassunga qanittorpassuupput. Taakku suli eqqaamannipput.
Aallaasersortoqarnerata kingunerisaanik nalaatsinerlunnermik ikiuigasuarfigineqarnissaq pisariaqartinneqarpat kommune ikiueqqaarnermik neqerooruteqartoq attavigineqarsinnaavoq.
