Tunup pilersorneqarnera misissorpaat
Misissueqqissaarnerup taassuma inerneri inassuteqaatillu nunatsinni attaveqaatinut tamarmiusunut Assartuussineq pillugu Isumalioqatigiissitap inassuteqaatai assigalugit ilaatinneqassapput.
Tunumi pilersuineq pillugu, aamma Nunani Avannarlerni Killerni angallannerup ilusilersugaanera pillugu Jane Petersenip IA-meersup paragraf 37 naapertorlugu apeqquteqaataata akissuteqarfigineqarnerani ilaatigut tamakku erserput.
Jane Petersenip ilaatigut apeqquteqaammini paaserusuppaa Tunumi umiarsuarmik allatut pilersuisinnaaneq pillugu Nunat Avannarliit Killiit Siunnersuisoqatigiiffiata inassuteqaatai pillugit Naalakkersuisut qanoq isummerniarnersut.
Jens B. Frederiksenili misissueqqissaarneq pillugu sukumiinerusunik oqaaseqarusunngilaq, neriuutigaluguli attaveqaatinik atalluarsinnaasunik, aningaasaqarnermi sinaakkusiussat atugassarititaasut iluanni innuttaasunut pitsaanerpaamik pilersuiffiusinnaasunik pilersitsisoqarumaartoq.