Tunumi raajarniarneq unittooqqavoq

Anders Olsen paragraf 37 naapertorlugu Naalakkersuisumut Ane Hansenimut apeqquteqarpoq tunumi raajarniarneq pillugu, akissutisiaalu eqqarsariaallannartortaqarpoq. Siornami 6.500 tons-it tunumi pisarineqarsimanngillat.

- Oqartariaqarpunga pisassiissutit taama atorneqarpianngitsiginerat tupaallaatigalugu. Suna tamatumunnga pissutaanersoq suli paasinngilara, kisianni tamanna malersugassaqqippoq. Tamanna allanngortittariaqarpoq, apeqquteqartoq Anders Olsen oqarpoq.

Naalakkersuisunut ilaasortap Ane Hansenip aamma paasiuminaatsippaa tunumi raajartassat taama atorneqanngitsiginerat.

- Maanna Sulitsisut Peqatigiiffiannik aalisartunillu oqaloqatiginnissutiginiarpara. Imaassinnaavoq tunumi aalisarneq nalunartoqartartoq, kisianni atorfilittama naatsorsorsimavaat raajat 50 millioner koruunit naligat aalisarneqarnissamut utaqqiinnartoq. Uagut nammineq tamanna atorluarsinnaanngikkutsigu isumaliutigisariaqarparput nunat allamiut aalisartuinut tamakkut pisassiissutiginissaat. Taamaaginnarsinnaanngilarli, Ane Hansen oqarpoq ajornartorsiutillu qiterisaa ujartorniarlugu aaqqiissuteqarnissaq siunertaralugu.

Ajornartorsiutip oqaaseqarfiginissaa GA-mit kajumiffigineqanngilaq. Bent Sørensen GA-meersoq Naalakkersuisunut innersuussiinnarpoq.