Tunumi kimittuutussanngikkallarput
Inatsisartut ilaasortaq Harald Bianco Naalakkersuisunut apeqquteqarpoq inerteqquteqarneq allanngutilersaarneraat. Kisianni Tasiilami IA-mioq tunumiut nunattalu ilaani allani najugallit ilimagissanngikkallarpaat imigassanik sakkortuunik pisisinnaalernissartik.
Peqqissutsimut Naalakkersuisoq Agathe Fontain ilisimatitsivoq Naalakkersuisut pilersaaruteqanngitsut imigassanik sakkortuunik tuniniaanissamut inerteqquteqarnerup atorunnaarsinnissaanut. Tamatuma allanngortinnissaanut Naalakkersuisut iliuuseqarnavianngillat kommune nammineerluni saaffiginnissuteqanngippat.
- Kitaani Tunumilu eqqaaneqartutut inerteqquteqarnermut tunuliaqutaapput pissutsit ajortut arlallit, tamakkulu ilaat inerteqquteqarnermik inatsisitigut aalajangersaasoqarnissaanik kommunalbestyrelsit kissaateqarnerannik malitseqarput, Agathe Fontain nassuiaavoq.
Inerteqquteqarnerlu atorunnaassappat ajornartorsiutit takkussinnaasut eqqumaffigeqquneqarput. Tassaapput ajornartorsiutit inunnik isumaginninnermut attuumassuteqartut inerteqquteqalernermut tunulequtaasimasut. Imigassamik atuineq pissutigalugu inerteqquteqalerneq ilaatigut pisimavoq isumaginnittoqarfik politiillu suliassarpassuaqalersarmata. Arlalitsigut meeqqat eqqorneqartunut ilaasarsimapput. Inerteqquteqarnerup atorunnaarsinnginnissaanut ilaatigut tamakku tunngavilersuutigineqarput.
