Tunu kommunalbestyrelsimi tallimanik sinniisuutitaqalerpoq
Tamaalilluni Kommuneqarfik Sermersuumi innuttaasut 15 procentii tunumi najugaqartut, kommunalbestyrelsimi inissat 26 procentii pissarsiaraat.
Tunumi qinigaaneerpaavoq Tasiilameersoq Thomas Kristensen, Atassut, taanna 188-init taaguunneqarpoq. Taassuma nuannaaarutigaa tunuminngaaneersut kommunimut qinersinermi iluatsitsilluarmata.
-Qinigassanngortittut Tasiilameersut pikkoriffigaarput kommunalbestyrelsimut isertitaqartitsinissaq, Thomas Kristensen oqarpoq, taassuma erseqqissaatigaa tusaaneqarnissartik pingaartikkamikku. - Qinigassanngortittut amerlanerat iluaqutaasimasoq, Thomas Kristensen oqarpoq.
Partiit Siumut, Inuit Ataqatigiit Atassut aamma Demokraatit Kommuneqarfik Sermersuup kommunalbestyrelsiani ilaasortaatitaqalerput. Taakkua tunumi pissutsit pillugit suleqatigiinnissaat naatsorsuutigineqarsinnaasoq Thomas Kristensen isumaqarpoq.
-Tunumi qineqqusaartut qineqqusaarutaat assigiiartorujussuupput, taamaattumik suleqatigiinnissarput naatsorsuutigineqarsinnaavoq, Atassut sinnerlugu Kommuneqarfik Sermersuup kommunalbestyrelsianut qinigaasoq Thomas Kristensen taama oqarpoq.
Sermersuup kommunalbestyrelsiani ukiuni kingullerni sisamani Illoqqortoormiut sinniisuutitaqarsimanani maanna qinigaatitaqalerpoq. Inuit Ataqatigiit sinnerlugit qinigassanngortittoq Charlotte Pike kisiartaalluni qinigaavoq, taannalu suliassaqarluarluni oqarpoq.
-Illoqqortoormiut sinnerlugit kommunalbestyrelsimut ukiut sisamat matuma siornatigut qinigaasoq qimarratiginniinnarnikuugami, Charlotte Pike oqarpoq.
Pike kommunalbestyrelsimi sulilluni aallartikkuni suliassanik ulikkaarluni oqarpoq.
-Tunniutiinnassanngilanga Illoqqortoormiut ineriartorteqqinneqarnissaanut ilungersussaanga, Charlotte Pike oqarpoq.
Illoqqortoormiuni sanaartornikkut suliaqartut amerlasuut suliffissaaleqipput.
Illoqqortoormiuni ilinniagaqartut aatsaat taama amerlatigisut suliffissaaleqipput, tassalu sanasut, ruujorilerisut innaallagissiortut allallu suliffissaaleqipput, taakkualu ilinniarsimasaminnik aallusseqqilernissaat anguniarneqartariaqartoq, Pike isumaqarpoq.
Illoqqortoormiuni piniartut tunitsivissaqanngillat. Piniagassanik peqarluarpoq taakkualu nunatta sinneranut tuniniarneqarsinnaalernissaannut Charlotte Pike suliniuteqarniarpoq.
Arctic Green Foodiusimasup tunisassiorfiata ammaqqinneqarnissaa Charlotte Pikep sulissutiginiarpaa. - Illoqqortoormiuni piniagassanik ulikkaarpoq, tunisassiorfik ammarneqarpat tunisassiat nunatta sinneranut tunisassiarineqarnissaat sulissutiginiaramiuk.
Illoqqortoormiunit Illoqqortoormiunullu timmisartukkut kiffartuussinerit Islandimiut timmisartuutileqatigiiffiannit Air Icelandimit ingerlanneqaraluarput. Namminersorlutik Oqartussat Illoqqortoormiuni innuttaasut apereqqaarnagit Air Greenlandip timmisartuutaannit timmisartuussisarnissaannik isumaqatigiissuteqarput, tamannalu pillugu Inatsisartunik oqaloqateqarnissara naatsorsuutigaara, Charlotte Pike oqarpoq.
