Tunngaviusumik inatsiseqalernissarput danskit naalakkersuisuisa killilimmik tapersersorpaat
Danskit naalakkersuisortaavisa venstreusut nassuerutigaat Savalimmiuni Kalaallit Nunaannilu namminerisamik tunngaviusumik inatsiseqalernisssamik kissaateqartoqartoq.
Naalakkersuisunngortitsinermi tunngavigineqartumi taama allassimasoqarnera, Inuit Ataqatigiit Folketingimi ilaasortaatitaata Aaja Chemnitz Larsenip nuannaarutigaa.
- Lars Løkke ataatsimeeqatigigakku tamanna eqqaasitsissutigaara. Taamaattumik naalakkersuisunngortitsinermi tunngavigineqartunut ilanngunneqarsimammat assorsuaq nuannaarutigaara.
Aamma atuaruk Danskit inatsisitaarfiat atlantikup avannaamiunit assortorneqarluni nalliussineqarpoq
Nassuerneq killeqarpoq
- Kisianni - naalakkersuisunngortunit nassuerneq killeqarpoq. Tassami ima allassimavoq: "aammattaaq pingaartuuvoq, namminerisamik tunngaviusumik inatsiseqalersinnaaneq naalagaaffeqatigiinnerup iluani inissaqartinneqarsinnaammata."
Taamatut oqaasertaliineq Inuit Ataqatigiinni qularutigineqarpoq.
- Imatut paasivara, assut ilungersunarsinnaasoq, tassami naalagaaffeqatigiinnerup iluaniissappat, tamanna Kalaallit Nunaata namminersulernissaa pillugu Inuit Ataqatigiit takorluugarinngilaa.
Aaja Chemnitz Larsen oqarpoq nangillunilu, kalaallit namminerisamik tunngaviusumik inatsiseqalernissaat tassaavoq namminersorneq.
Naalagaaffeqatigiinneq inissalerujussuaq
Aarhus Universitetimi professori Jørgen Albæk Jensen, pisortat sullissineranni inatsisinik immikkut ilisimasaqartuusoq, naapertorlugu danskit politikeriisa naalagaaffeqatigiinneq inissalerujussuarmik paaserusussinnaavaat, kalaallit tunngaviusumik inatsiseqalernissamik kissaataat naammassiumallugu.
Aamma atuaruk Savalimmiormiu: Atlantikup avannaamiut Folketingimi issiatitaqarunnaassappat?
Taassumali isumaa malillugu ataasiakkaat qasukkartiterneqarsinnaanngillat. Assersuutitullu taallugu Kalaallit Nunaat nunanut allanut tunngasunut politikkimi 100 procentimik ingerlatserusussagaluarpat imaluunniit nammineq eqqartuussiviit qullersaannik pilersitsilluni.
- Tunngaviusumik inatsimmi erserpoq, eqqartuussiviit ataatsimik qullersaqassasut, sulianilu assigiinngitsuni aalajangersimasuni eqqartuussiviit ataatsimik qullersaqarnissaat periarfissaasariaqartoq. Aaqqissuussisoqarsinnaassanngilarlu eqqartuussutit Kalaallit Nunaanni Savalimmiuniluunniit eqqartuussissutaasimasut danskit eqqartuussiviisa qullersaanni ingerlanneqarsinnaanatik.
Kalaallit kissaataat ataqqineqarpoq
Siumumiit folketingimut ilaasortap Aleqa Hammondip naalakkersuisut oqaasertaliinerat nuannaraa.
- Apeqqutaanngilaq, oqartussaqarfiit sorliit suut ataaniissanersut. Politikkikkut ataqqineqarpoq pisinnaatitaaffitta iluani kalaallit kissaatigimmassuk namminneq tunngaviusumik inatsiseqalernissartik. Tamannalu akuersaarneruvoq, isumaqarpungalu ajunngilluinnartuusoq naalakkersuisut tamanna akuerimmassuk, Aleqa Hammond oqarpoq.
