Folketingimut qinersineq 2015 Savalimmiormiu: Atlantikup avannaamiut Folketingimi issiatitaqarunnaassappat?
Folketingimut ilaasortap Savalimmiuneersup Sjúrður Skaalep partiimit Javnaðarflokkurinimeersup, kalaallit Savalimmiormiullu Folketingimi ilaasortaatitaqarnerisa iluaqutissartaqarneranik apeqqusiilluni oqaaseqarnerata kingorna tamanna pivoq:
- Atlantikup avannaamiut Folketingimut sisamanik ilaasortaatitaqarlutik inatsisinik uatsinnut attuumassuteqanngitsunik akuerseqataasassanersut oqallisigineqarsinnaavoq, aviisimut Jyllands-Postenimut taama oqarpoq.
AAMMA ATUARUK Savalimmiormiut aalajangiisooratarsinnaasut
Inatsit tunngaviusoq, Savalimmiut Kalaallit Nunaatalu katillugit sisamanik Folketingimi ilaasortaatitaqarnissaannik qulakkeerinnittoq, Skaalep pissusiviusunut naapertuutinngilluinnarnerarpaa.
Tunngaviusumillu nunanut allanut illersornissamullu politikki taamaallaat atlantikup avannaamiut ilaasortaatitaannut attuumassuteqarnerarpai.
- Pissutsini assigiinngitsorpassuarni inatsisip tunngaviusup avataatigut suliaqartuuvugut. Namminerisatsinnik akileraartarnikkut akilersuisitsisarpugut, nammineq atortulersuuteqarlutalu namminerisatsinnik ilageeqarpugut, naak inatsimmi tunngaviusumi allassimagaluartoq, ilagiit danskit naalagaaffiata ataaniittussaasut, Sjúrður Skaale taama oqarpoq.
AAMMA ATUARUK Attaveqaqatigiittarfinni #glpol pillugu nutaarsiassat kingulliit
Københavnip Aarhusillu Universitetiini ilisimatuut Jyllands-Postenimut oqaatigaat Danmarkimi tunngaviusumik inatsit Atlantikullu avannaamiut Folketingimi ilaasortaatitaqarnerat allaanerusumik ilusilerlugit eqqarsaatigeqqinneqartariaqartut.