Tuluit Nunaat EU-mi ilaasortaajunnaalersoq
![](/sites/default/files/styles/image_934x467/public/article_images/brexit.jpg?itok=4SozEiJO)
Tuluit Nunaata EU-mi ilaasortaajunnaarnissaa, Tuluit Nunaanni avissaartuutsitsivoq, Tuluit Nunaannimmi innuttaasut EU-mi ilaasortaaginnassanerlutik ilaasortaajunnaassanerlutilluunniit 2016-imi juunip ulluisa 24-anni taasitinneqarmatali qinersisartut 17,4 millionit ilaasortaajunnaarnissamut tapersersuipput, 16,1 millionillu akerliullutik.
Tuluit EU-mik, pisortatigoortumik, aqagu februaarip aallaqqaataani ilaasortaajunnaarsimassapput, tamannali Tuluit Nunaanni EU-milu nunat akornanni ulluinnarni inuunermut aallaqqaammut allanngortitsivallaarnavianngilaq.
Tuluit EU-mi malittarisassanik inatsisinillu ilaasortaajunnaarnerup nalaani ikaarsaarnermi malinnittussaapput, EU-mili politikkikkut aalajangiinernut sunniuteqaqataasinnaanatik, politikkikkulluunniit sulinermi sunniuteqaqataasinnaassanatik.
AAMMA ATUARUK Dronning Elizabethip Tuluit Nunaata EU-mit aninissaa akuerigaa
Tuluit EU-parlamentimi ilaasortaatitaat Bruxellesimi allaffitik imaarpaat, ilaat tussunngusimaarlutik, ilaat nuannaaqalutik.
Tuluit Nunaata EU-mi ilaasortaajunnaarnissaanut ikaarsaariarneq qaammatinik aqqanilinnik aallaqqaammut sivisussuseqassaaq.
Ikaarsaariarnerup sivitsorneqarnissaa illuatungeriit ukioq manna juulip aallaqqaataatinnagu aalajangersinnaavaat, ikaarsaariarnerli sivitsorneqarnavianngitsoq, Tuluit Nunaanni ministeriunerup Boris Johnsonip neriorsuutigereerpaa.