Tuluit ministeriunerisimasaat May NATO-mi pisortassatut piukkunneqartoq
Nato-mi illersoqatigiit aappaagu nutaamik pisortassaminnik toqqaalerunik Tuluit Nunaanni ministeriusimasoq Theresa May Nato-mi pisortassatut piukkunnarluinnartutut taaneqarpoq.
Tuluit Nunaani illersornissamut ministeri Ben Wallace taama oqartoq, aviisip Daily UK Newsip allaaseraa.
- Theresa May pisuni imaannaanngitsuni ministeriunerulluartorujussuuvoq. Isumannaallissaanermut ministeriunerma nalaani suleqatigaara. Theresa May Natomi pisortassatut piukkunnartorujussuuvoq, Wallace oqarpoq.
AAMMA ATUARUK Theresa May tunuartoq
Theresa May Tuluit Nunaanni 2016-mit 2019-mut ministeriuneruvoq.
Theresa Mayip Natomi pisortassatut piukunneqarnera Nato-mi nunat ilaasortat naalakkersuisuisa siulittaasuisa Bruxellemi ataasinngornermi ataatsimiinnissaat sioqqullugu saqqummiunneqarpoq.
Theresa May Nato-mi pisortassatut piukkunneqarninni pillugu suli oqaaseqanngilaq.
Jens Stoltenbergup pisortatut atuuffik danskit ministeriunerisimasaata, Anders Figh Rasmussenip 2009-imit atuuffigisaa 2014-imi atuuffigilerpaa.
Brexit pissutigalugu tunuartoq
Theresa May 2019-iimi juunip ulluisa arfineq aappaanni ministeriunertut tunuarpoq.
Theresa Mayip EU-mit aninissaq pillugu isumaqatigiissuteqarniarnera akuerineqanngimmat ministeriunertut taamani tunuarpoq. Soorlu aamma naalakkersuisuutitani tunuliaqquttanilu EU-mit aninissaq pillugu akuersitinniarsimagaluarpai taperserneqanngilarli.
Theresa Mayip EU-mit aninissaq Underhusetimi akuerineqarnerani tunuarniarluni oqaatigeqqaarnikuugaluarpaa, isumaqatigiissuteqarnermi sioqqullugu tunuarpoq.