Tuluit ministereqarfiat: Russit sakkutooqatigiivi Wagnerikkut ilinniarfinni sakkutuussarsiortut

Russit illersornissaq pillugu ministereqarfianni qullersat aamma sakkutooqatigiit Wagnerimik taaguutillit akornanni isumaqatigiinngittoqarnerata kinguneranik, sakkutooqatigiinnut arlalitsigut kinguneqartitsisoqartussanngorunarpoq.

Tuluit illersornissaq pillugu ministereqarfia Twitterimi ullumi ataasinngornermi taama allappoq. Ukrainemi sorsunneq pillugu tuluit ministereqarfiat ullut tamaasa nalunaarsuisarpoq.

- Sakkutooqatigiit Wagnerip piginnittuata, Jevgenij Prigozjinip, russit parnaarussiviinit sakkutuussanik ujarlertarnera pillugu russit illersornissaq pillugu ministereqarfiannit tamanna ajornartinneqalersorlu isumaqatigiinnginneq pilerpoq, tuluit Twitterimi allapput.

Tamannalu pillugu sakkutooqatigiit Wagnerikkut sakkutuussanik allani ujarlertalerput.

- Russit inuusuttut ilinniarfiini apeqqutinik immersugassanik, 'Inuusuttup sorsuttartup qinnuteqaataa'-nik taaguutilinnik,  Wagnerip sakkutuui kiinnamikkut assiaqutillit agguaassillutik paasissutissiisalersimapput, tuluit ministereqarfiat allappoq.

Russit sakkutooqatigiivi Wagnerikkut Ukrainemi 50.000-t pallillugit sakkutooqartut, tuluit illersornissaqarfiat januaarimi paasissutissiivoq.