Russit Bakhmut unguleraat
Qaammatini arlalinni akersuuttoqareersorlu Ruslandimp Bakhmut ungungajalerpaa.
Russit Bakhmutimut taassumalu eqqaanut sakkortuumik eqqaarsarinnikkaluaqisut, Ukraine akiuuttuarsinnarpoq.
Ukrainep avammut ilummullu isaavia kingullerpaaq Bakhmut russet assersorniarsarigaluarpaat.
Ukrainep kangiatungaaniittoq illoqarfik taanna qaammatini arlalinni russit assut saassutaarisimaqaat toqqisassatut pingaartutut isigalugu.
Russit sakkutuuisa tallimanngormat illoqarfimmi tassani angallaviit arlallit eqqaarsaraat ilaatigut qamutillit rakitsit sakkullu allarpassuit atorlugit.
Illoqarfimmi tassani sakkutuut Wagner-gruppemik taaneqartartut naalagaata oqaluttuarnera naapertorlugu, illoqarfik tamangajalluinnarmi unguneqarsimanerarneqarpoq, angallavillu ataasiinnaq Ukrainep tungaanukartoq maanna ammasoq oqaatigalugu.
Nutaarsiassaqarfittaaq Reuters alaatsinaatsunut ilaavoq, taakkulu paasissutissiinerat naapertorlugu
Ikaartarfissuaq illoqarfimmi Khromovemiittoq aamma aserorsimavoq.
Sakkutuut Wagner-gruppenimeersut siuttuat illoqarfimmiit 7 kilometerisut avinngarusimasumiilluni illorsuup qaavaniit videokkut immiussilluni oqaluttuarsimavoq, taannalu ima oqarsimavoq:
- Anillariarnissatsinnut ataasiinnaq kisiat aqqutissarilerparput, aqqutissatuannguarpullu aamma matungajalerpoq, Wagner – gruppenikkut siuttuat taama oqarsimavoq.
Ukrainemiut sakkutuuisa ikilersimasortatik annaanniarsariitigalugit akersuupput, sulilu tunniutiinnaratik. Ukrainep kitaani assaallutik pallittaalisaliorput taamaalillutik sakkutuutik illersorumallugit.
Ukrainemiuttaaq siuttuisa ilaat Volodymyr Nazarenko Ukrainamiut tusagassiorfiini issuarneqarpoq pissutsit massakkorpiaq atuuttut aarlerinartumut killittut.
Erseqqissaatigineqarporlu ulloq unnuarlu atorlugit akersuunnerit ingerlaaginnavissut.
- Qanoq ajorsartiginerat pineqanngilaq, sakkutuutta suliassaraat sapinngisartik tamaat akeqqat ajorsartinniarsarissallugit, Ukrainemi nunaminertaq meteri tamarmi akeqqatta inuunerannik taamannanik naleqartarpoq, Nazarenkop oqaatsini taama ilavai, nangipporlu:
- Sakkugut taakkuinnaasut atorlugit Russit sakkutuuinut aseruinissatsinnut russit sakkutuui amerlavallaarujussuarput Volodymyr Nazaranke oqarpoq.
