Russit Ukrainemi nunap immikkoortuini arlalinni saassussisut
Russit Ukrainemi nunap immikkoortuini arlalinni sisamanngornermi ullaakkut saassussipput. Atorfilittat taama oqartut, nutaarsiassaqartitsivik Reuters allappoq.
Ukrainep kippasissuani nunap immikkoortuani Lvivimi inuit sisamat najugaqarfimminniitsillutik toqutaapput.Taakku angerlarsimaffiat raketimik eqqorneqartoq, Lvivip guvernøria avammut tusagassiisarfikkut Telegramikkut taama nalunaaruteqartoq nutaarsiassaqartitsivik AFP allappoq.
- Inersimasut sisamat toqutaasimanerat maanna ilisimavarput. Angutit marluk arnallu marluk, guvernøri allappoq.
Ukrainemi nunap immikkoortuini allani innaallagiaaruttoqarpoq.
Nunap immikkoortuata Odesap guvernøriata oqarnera naapertorlugu Odesami innaallagissiorfiit ilaat eqqorneqarmat innaallagiaaruttoqarsimalerpoq.
Innissiat aamma eqqorneqarput.
Illoqarfik Kharkiv 15-eriarluni aamma eqqorneqartoq, tamaani guvernøri Telegramikkut nalunaarpoq.
- Akeqqat illoqarfik nunallu immikkoortua 15-eriarlutik eqqorpaat nunallu atortulersugaaneranut pingaarutillit ilaatigut eqqorneqarlutik, taanna oqarpoq.
Europami atomimik nukiliorfiit annersaat, Zaporizjzja, aamma eqqorneqarpoq. Nukiliorfik taanna russinit aqunneqarpoq, Ukrainemili innaallagissiorfiit kingulliit ilaat eqqorneqarsimavoq.
Atomimik nukissiornermik Ukrainemi qullersaqarfik, Energoatom, taama nalunaartoq, nutaarsiassaqartitsivik Reuters allappoq.
Ukrainep kangisissuani illoqarfik Bakhmut ulluni kingullerni sakkuaaffiungaatsiarpoq, ukrainemiut sakkutuui russit sakkutuuinut sakkutuunullu namminersortunut Ruslandimeersunut Wagnerimik taaguutillinnut akiuussimallutik.
Bakhmutip kangisissortaanik tiguaasimallutik, Wagnerikkut aqutsisuat Jevgenij Prigozjin ippassaq pingasunngornermi ullaakkut oqarpoq.