Russit igeriuttakkanik Ukrainep ilarujussuani qaartartumeeralutik saassussisut
Ukraine tamakkerlugu nukissiorfiit russit qaartartuinit igeriuttakkanit eqqorneqartut, Ukrainemi naalagaaffiup nukissiorfiata ilisimatitsissutigaa.
Illoqarfiit pingaarnersaanni Kyivimi nunallu immikkoortuini qaninnerni qaartoqarpallattarnera tusarsaasoq, takunnittut oqarput.
Ukrainep kangisissuani illoqarfissuup Kharkivip borgmesteriata oqarnera naapertorlugu innaallagissiorfik eqqorneqarpoq. Tamanna pissutigalugu Kharkivimi innuttaasut innaallagissamik pilersorneqarunnaaratarsinnaasut, borgmesteri oqarpoq.
Ruslandip Ukrainemi sakkutujuunngitsut siorna oktobarimili saassuteqattaarpai, nunap atortulersugaanera ilaatigut aamma eqqorniarneqarluni. Ukrainemi innuttaasut sanngiillisinniarneqartut saassussiumatujuunnaarsinniarneqartullu oqaatigineqarpoq.
AAMMA ATUARUK Zelenskyj: Ukraine EU-mi ilaasortanngussaaq
Ukrainep præsidentia, Volodymyr Zelenskyj, Europami nunanut assigiinngitsunut piffissami kingullermi angalareersorlu, russit saassussisarnitik sakkortuseriaannarpaat.
Zelenskyj kingullertut Polenimiippoq. Polenip præsidentia Andrzej Duda ippassaq sisamanngornermi unnukkut ataasimeeqatigaa.
Amerikamiut raketinut illersuutinik Patriotinik Ukrainemut pilersuinissamik sapaatit akunnerisa kingulliit ingerlaneranni neriorsuipput, soorlu aamma raketinut illersuutit Europameersut Ukrainemut tunissutiginiarneqartut.
Tyskit qamutit sorsuutaat Leopard 2-t Ukrainemut aamma tunissutiginiarneqarput, Danmark tunissuteqarniartunut ilaalluni.Qamutilittaatit Haubitserit 19-it Danmarkip Ukrainemut aamma nassiunniarpai.