Zelenskyj: Ukraine EU-mi ilaasortanngussaaq

Ukraine EU-mut ilaasortanngornissaq pillugu aalajangiusimasumik sulissuteqassaaq.

Ukrainep præsidentia Volodymyr Zelenskyj, EU-mi nunat naalakkersuinikkut siuttuisa Bruxellesimi ataatsimeersuarnissaat sioqqullugu tusagassiortunut sassarnermi taama oqarpoq.

Ukraine aningaasatigut sakkussiatigullu EU-mi nunanit ikiorneqaannarnissaanik kissaateqaannarnani, EU-mut ataavartumik ilaasortanngorusuttoq, Zelenskyj-p erseqqissaatigaa.

- Ukrainep EU-mi ataatsimiittarnernut peqataasalernissaa pissusissamisuuginnarpoq. Ukrainemiusummi oqaatsit Europamut ilaapput, taanna oqarpoq.

Zelenskyj EU-Parlamentip ataatsimiinneranut, EU-milu naalakkersuinikkut siuttut Bruxellesimi ataatsimiinnerannut ullup ingerlanerani peqataavoq.

AAMMA ATUARUK Ukraine Moldovalu EU-mut ilaasortanngorsinnaanissaat akuersissutigineqartoq

Ukrainep EU-mut piaarnerpaamik ilaasortaalernissaa, EU-Parlamentimi amerlanerussuteqarluartut kissaatigaat.

EU-mi siuttut Ukrainep kissaataanut paasinnilluarputtaaq:

- Angerlamut tikilluarit. EU-mut tikilluarit, EU-p præsidentia Charles Michel sisamanngornermi oqarpoq. EU tassaavoq Ukraine, Ukrainelu tassaalluni EU, taanna ilanngullugu erseqqissaavoq.

Ukrainelli EU-mut ilaasortanngorusunnera mianernartuuvoq.

Ukrainemi sorsuttoqarnera eqqarsaatigalugu Ukraine EU-mut ilaasortanngorsinnaasutut siorna isigineqalerpoq. Ukraineli EU-mut ilaasortanngorsinnaanissamut suli EU-mut nunanut 27-nut naleqqiullugu ungasippoq, EU-mimi nunat 27-t naligalugit inissisimalissappat suli ungaseqaluni.

Ukrainemi suli sorsuttoqalinngitsoq Ukraine Europami nunani piitsuunernut ilaavoq - peqquserluttuliortoqarnera, tamallu oqartussaaqataanerisa inissisimanerata sanngiinnera pissutigalugu.