Tuberkulose nungusaruminaaqaaq
Tuberkulose-mik tunillatsittut ukiormanna septemberip tungaanut 89-iupput ukiorlu naappat tunillatsissimasut amerlassagunarput. Siorna 114-it tunillatsissimasut paasineqarput ukiorpassuanngortunilu aatsaat taama amerlatigisut tuberkulose-mik napparsimapput. Maanna Naalakkersuisut isumaliutigilerpaat immikkut inatsisiliornikkut nappaat akiorniarneqassanersoq.
Naalakkersuisut erseqqissarpaat tuberkulose-p akiorniarnera pinngitsaaliinikkut ingerlanneqassanngitsoq.
- Taamatut katsorsaasarneq nammineq najukkami aallaavissiuinernik suliniuteqarnerit annertusarnerisigut ingerlanneqarsinnaavoq. Naalakkersuisut pineqartoq siunissami malinnaaviginiarpaat, tamatumunngalu tunngasumik immikkut inatsisiliorsinnaaneq isumaliutersuutigalugu, Peqqissutsimut Naalakkersuisoq Agathe Fontain oqarpoq.
Niels Thomsen Demokraatineersoq paragraf 37 tunngavigalugu tuberkulose pillugu apeqquteqaateqarpoq. Paasinarsivorlu ukiormanna tubekulose-mik napparsimasut amerlajumaartut.
- Meeqqat tunillatsissimasut amerlanerisa kiisalu sakialluummik nappaatillit nutaat amerlanersaasa tunillaassuunnerisa takutippaat, sakialluummik nappaatillit kingusissukkut nassaarineqartartut, aammalu inuiaqatigiinni nappaat assut siaruaassimasoq, Agathe Fontain Niels Thomsenimut akissummini nassuiaavoq.
Tunillaassuunnerlu pivoq misissuinerit annertuut piffissarujussuaq atorlugu ingerlanneqaraluartut. Tamanna ilaatigut kujataani pivoq taqqavani tunillatsittut amerlammata nappaammit tassannga 1950-ikkunni nunatsinni toqoraataasimasumit.
Peqqinnissaq pillugu nunarsuarmi suliniaqatigiiffik WHO inassuteqaraluarpoq maanna misissuineq pinnagu nappaatip aallaavissiorneranut nukiit atorneqarnerusariaqartut. Taamatulli suliaqassagaanni innuttaasut nappaat pillugu ilisimasaat annertusarneqartariaqarput aammalu misissuinermi peqataanissaat pingaaruteqassusaa paasineqartariaqarluni.
Taamaammat Naalakkersuisut isumaliutigaat tuberkulose nappaatinut tunillaassortunut inatsimmut ilanngunneqassanersoq tassani periarfissaqarmat pinngitsaaliissummik misissuisinnaaneq.
