Trumpip Putinimik oqaloqateqarsimanera pillugu NATO-p pisortaa nersualaarivoq
Ataasinngornermi Donald Trumpip Vladimir Putin ulluni 30-ni sakkuaakkunnaarnissamik akuerseqqullugu qularunnaarsitsinngitsoornerata kingorna, USA Ruslandimik tatinerusariaqarnersoq NATO-p generalsekretæriata Mark Ruttep oqaaseqarfigiumanngilaa.
Hollandimiu 58-inik ukiulik marlunngornermi EU-mi illersornissamut ministerit Bruxellesimi ataatsimiinnissaannut iseriartornermini taama oqarpoq.
USA-p, Ruslandip, Ukrainep Europallu akornanni oqaloqatigiinnerit ingerlanerat Ruttep taarsiullugu ukkataraa.
- Præsident Trumpip siulersuilernera nuannaarutigeqaara. Januaarimi præsidentinngornermini politikkikkut aaqqiagiinnginnerit kipitippai.
- Januaarip tungaanut arlaannaanilluunnit Ruslandi oqaloqatigineqanngilaq. Trumpip Ruslandip præsidentianik attaveqarnermik ammaanera pitsaasuuvoq, Mark Rutte oqarpoq.
NATO-mi generalsekretæritut nunat 32-t peqatigiiffianni iligiinnermik qulakkeerinnittussaavoq.
USA-li NATO-mi nukittunerpaavoq sakkutooqarnikkullu annertunerpaamik tunniussaqartarluni, taamaattumik Ruttep USA-p præsidentia isornartorsiornaveersaartarpaa.
Ataasiakkaariniartoq
Præsident Trumpip Ruslandip præsidentianik sakkuaakkunnaarneq pillugu akuersititsiniarnerata suli iluatsinnginnera Europami siuttut pakatsissutigaat.
Marsip aqqarnanili Ukrainep ulluni 30-ni sakkuaakkunnaarnissani akueraa, taannalu eqqissinissamik isumaqatigiinniarnernut tunngaviliisussaanikuuvoq.
Sakkuaakkunnaarnissarli sioqqullugu eqqissinissamut piumasaqaatit inissinneqaqqaartariaqartut, maannamut Ruslandip aalajangiusimavaa. Taamaattumik maannamut Ukrainemi sorsunneq ingerlaannassaaq.
- Soorunami sukkaannaq angusaqarnissaq neriuutigiuaannarparput, kisiannili pissutsit piviusut taamaanngillat. Periarfissaajuaannanngilaq.
- Ataasiakkaaraluta iliuuseqartariaqarpugut sapaatillu-akunnerini tulliuttuni qanoq pisoqassanersoq utaqqisariaqarlutigu, Mark Rutte oqarpoq.
/ritzau/
