Trumpip peqquserluttuliorsimasutut pasineqarluni akiliisussanngortinneqarnera kinguartinneqartoq
![](/sites/default/files/styles/image_934x467/public/2024-03/20240326-095720-L-1920x1280we.jpg?itok=yBxF5fre)
USA-p præsidenterisimasaata Donald Trumpip peqquserluttuliorsimasutut pasineqarluni 464 millionit dollarinik, imaluunniit 3,2 milliardit koruuninik akiliisussanngortinneqarnera kinguartinneqarpoq, qularnaveeqqusiussanillu taarsiullugu 175 millionit dollarinik, imaluunniit 1,2 milliardit koruunit missaannik akiliisussanngortinneqarluni.
New Yorkimi eqqartuussiviup ingerlatitseqqiisarfiup tamanna aalajangerpaa. Nutaarsiassaqartitsivik CNN taama allaaserisaqarpoq.
Eqqartuussiviup ataasinngornermi taama aalajangiineratigut Trump aningaasat akiligassat sinneri nassaariniarnissaannut piffissaqarnerulerpoq, qularnaaveeqqutitullu akiligassat ikinnerungaatsiartinneqalerlutik.
Trumpip 464 millionit dollarinik aallaqqaammut akiliisussanngortinneqarneranut ataasinngorneq tassaavoq New Yorkip inatsiseqarnermut ministeriata Letitia Jamesip piffissaliussatut killiliussaa.
Trumpip suliffiutimi Trump Organizationip nalinga piaaraluni naleqarnerusutut nalunaarutigisimaneranut atatillugu ukioq manna februaarimi akiliisussanngortinneqarpoq.
Trumpip - USA-mi republikanerit sinnerlugit præsidentimut ukioq manna novembarimi qinersisoqarnissaanut sassartitassaattut isikkoqartup - eqqartuussiviup aalajangernera, akiligassallu annertussusaa arlaleriarluni akerlilernikuuaa.