Trumpip Korea Avannarliup præsidentia killeqarfimmi naapikkaa

Præsidentit taakku naapinnerat TV-kkut toqqaannartumik aallakaatinneqarpoq, Trumpillu Kim Jong-un qujassuteqarfigaa:

- Maaniissinnaagama nuannaarutigaara, naapeqqaarakkuli aamma nuannaraara, Donald Trump, Kim Jong-un pillugu oqarpoq.

Trumpip naapeqatigiinnissamut kissaateqarnera Kim Jong-unip tupaallaatigaa.

Donald Trump Korea Avannarlermut ullumi sapaammi annguppoq, Korea Kujalliup Avannarliullu akornanni killeqarfik siullerpaamik takullugu.

Killeqarfiup nalaani naapinneq Korea Kujalliup præsidentianit Moon Jae-inimit uppernarsarneqarpoq, nunat suliffissuaqarfiit annerit 20-t, tassa G20-t, Japanimi ataatsimeeqqammernerannit Japanimit Korea Kujallermut tikeqqammerlutik.

- Killeqarfimmukalerpugut, siuttorlu Kim tassani naapissavara, naapinnissaalu qilanaarivara, Donald Trump oqarpoq.

Korea Avannarliup atomip nukinganik atuisinnaanissaanut USA-p Korea Avannarliullu isumaqatiginninniarnerisa nanginneqaqqissinnaanissaat, killeqarfiup nalaani naapeqatigiittoqarneratigut neriuuteqalersitsivoq. Siusinnerusukkut isumaqatiginninniartoqareerpoq, angusaqartoqarnanili.

    /ritzau/