Trumpip golfertarfiata eqqaani aallaasersortoqartoq

USA-mi præsidentiusimasoq Donald Trump naalagaaffimmi Floridami golfertarfimmini golfertilluni ataasinngornermut unnuaani aallaasersorfigineqarpoq.

Trumpip inuunera ulorianartorsiortinneqanngitsoq Floridami politiit oqaatigigaat, aviisi The New York Post allappoq.

Angut golfertarfiup nalaani aallaasersorneragaasoq paarsisumit Secret Servicemeersumit aallaaneqartoq, USA-mi nutaarsiassaqartitsiviit ilaat AP allappoq, aallaasersortullu Donald Trump eqqorniarsimagaa nutaarsiassaqartitsivimmut CNN-imut oqaatigineqarluni.

Aallaasersortoqareerneraniit akunnerup aappaata qeqqa qaangiuttorlu, Donald Trump tusagassiorfinnut ima nalunaarpoq:

- Unitsinneqarsinnaanngilanga ajunngilangalu, taanna oqarpoq.

Præsident Joe Biden præsidentillu tullesortaa Kamala Harris aallaasersortoqarnera pillugu ilisimatinneqarsimasut, præsidentip illorsuata nalunaarutigaa, Trumpillu ajunnginnera nuannaarutigalugu nalunaarutigaat.

Donald Trump naalagaaffimmi Pennsylvaniami qaammatit marluk matuma siornatigut qineqqusaarnermini toqoriaraluarneqarpoq. Siutaa talerperleq taamanikkut eqqorneqarpoq, aallaasersortorlu isumannaallisaanianit aallaaneqarluni toqutaavoq.

Angut ataaseq qineqqusaarnermi tassani aallaasersortoqarnerani toqutaavoq, allallu marluk ikilerneqarlutik.