Partiit Kim Kielsenimut: Trumpimut uku apeqqutigikkit
Naalakkersuisut Siulittaasuata Kim Kielsenip USA-llu præsidentiata septembarimi naapinnissaannut partiit præsidentimut apeqqutissaminnik apuussaqarusupput.
Siullertut Joint Committeep nutarterneqarnissaa, Nivi Olsenip, Demokraatinut siulittaasuugallartup, neriuutigaa.
AAMMA ATUARUK Trump-imik ataatsimeeqateqarneq Amerikamiut nuannarineqalerniarnermik suliunitaanni alloriarneruvoq
Joint Committee 2004-mi pilersinneqarpoq. Nunatta, Danmarkip USA-llu akornanni suleqatigiinnerit assigiinngitsut ilaatigut ilinniartitaanermut, peqqinnissamut, ilisimatusarnermut kulturimullu tunngasut Joint Committeemi oqallisigineqartarput. Tamanna USA-p sakkutooqarnikkut nunatsinniinneranut taarsiissutitut taaneqarsinnaasumik atorneqarpoq.
Nunattali Danmarkillu Pituffimmi 2014-imi kiffartuussinissamut isumaqatigiissutit, USA-mi suliffeqarfimmut tunniunneqartut, akerleralugit ataatsimiittarnerit peqataaffigiumajunnaarpaat.
Kunngeqarfiulli Joint Committeemi sulinerup 2018/2019-imi aallarteqqinneqarnissaa pillugu amerikamiut isumaqatigiissuteqarfigai.
Periarfissatsialak
- Isumaqatigiissutip Joint Committeep nutarterneqarnissaa piffissanngorpoq. Taamaammat taanna eqqartorneqarnissaa kissaatigalugulu neriuutigaarput immaqalu nutaamik isumaqatigiissusiornermik kinguneqarumaartoq, Nivi Olsen oqarpoq.
AAMMA ATUARUK Præsidentip naalakkersuisut siulittaasuat naapeqatigisussanngoraa
Partii Naleqqameersut neriuutigaat Naalakkersuisut Siulittaasuat partiit assigiinngitsut oqariartuutaannik præsident Donald Trumpimut apuussiumaartoq:
- Ikinnerussuteqarluni naalakkersuivoq, taamaammallu partiinik tusarniaanissani pisussaaffigaa, Pele Broberg oqarpoq.
Kalaallit Nunaat aalajangiisooqataanerusoq
Kalaallit Nunaat pineqartillugu nunatta aalajangiisooqataanerunissaa peqataatinneqarnerunissaalu pingaarnertut eqqartorneqartariaqartoq, Pele Broberg oqarpoq:
- Akunnermiliuuttoqarata niuernissatta ineriartortinneqarnissaa pingaarnertut apuukkusupparput. Taava aamma sakkutooqarneq sakkortusarnagu nunatta eqqissisimasumik ineriartornissaa pillugu apuussinissaa neriuutigaarput.
Inuit Ataqatigiit Partii Naleqqatulli isumaqarput nunarput pineqartillugu nunatta naalakkersuinikkut peqataatinneqarnissaa erseqqissaatigissallugu pissusissamisoortoq.
Nunatta soqutigisai ilanngunneqarlik
- Ajornerusumik inissisimassanngilagut, nunarput uani pineqarpoq nunatsinnilu soqutigisagut pingaartillugit suliarisariaqarpagut.
Mute Bourup Egedep ilanngullugu oqaatigaa nunatta Itillimi isumaqatigiissummit Igalikumilu isumaqatigiissummit ajornerusumik inissisimalinnginnissaa neriuutigalugu.
Isumaqatigiissutini taakkunani allassimavoq nunarput pineqartillugu, soorlu sillimaniarnermut tunngasunut, USA-millu suleqateqarnikkut Kalaallit Nunaat peqataatinneqassasoq.
Naalakkersuisut siulitaasuat Kim Kielsen KNR-imit oqaaseqartinniarneqaraluarpoq tamannali iluatsissinnaasimanngilaq.
Tusagassiortunut nalunaarummi sisamanngornermi ualikkut nassiunneqartumi Kim Kielsen allappoq, naalagaaffeqatigiit issittortaammat, tamanna tunngavigalugu ataatsimiinnermi peqataanissaq Naalakkersuisunit qilanaarineqartoq.
Ataatsimiinissamut kissaatigineqartussat suunerinik Siumut oqaaseqarusunngilaq, partiimi oqaluuserineqartinnagit.
