Assi: Scanpix

Naalagaaffeqatigiit naapittussanngortut Præsidentip naalakkersuisut siulittaasuat naapeqatigisussanngoraa

Donald Trumpip Danmarkimi septembarip ulluisa aappaanni pingajuannilu tikeraartussanngorpaa, tikeraarnerminut atatillugu, Naalakkersuisut siulittaasuat, Kim Kielsen naapeqatigisussanngorpaa.

Donald Trump nulialu Melania Trump dronning Margrethemit qaaqquneqartut, Kunngikkormiut nalunaarutigaat.

Donald Trumpip Danmarkimiinnermini statsministeri, Mette Frederiksen naapeqatigissavaa. Statsministereqarfillu naapertorlugu Trumpip Naalakkersuisut siulittaasuat, Kim Kielsen aamma Savalimmiuni lagmandi, Aksel V. Johannesen aamma naapeqatigissamaarpai.

USA'p præsidentia, Donald Trump præsidentip illuarsuani tusagassiortunut marlunngornermi oqarpoq, Europamut septembarimi angalanissamut atatillugu Danmarkimukiliaratarsinnaalluni. Tamannalu piviusunngortussanngorpoq.

Donald Trumpillu tikeraarnissaanut qilanaartoqalereerpoq:

- Præsidentip Danmarkimi naapeqatigiinnissaanut qilanaarpunga, nunarsuarmi politikikkut soqutigisat eqqartussavagut, aamma Danmarkip USA-llu qanimut suleqatigiissutaasa qanoq nukittorsarneqarnissaanut eqqartuissalluta, ilaatigut sillimaniarnikkut politikki, issittumi apeqqutit, niueqatigiinneq aningaasaliisarnerillu eqqartorneqassapput, statsiministeri, Mette Frederiksen oqarpoq.

Issittoq Trumpip Danmarkimut tikeraarneranut peqqutaaqataavissunut ilaasoq siornatigut nunat allat pillugit ministeriusimasoq Martin Lidegaard isumaqavippoq.
Issittumi Ruslandip pingaaruteqartutut inissinnissaa Trumpip annilaanngatigaa, Danmarkillu nunarsuup ilaani tassani pissangartorsiunnginnerup ingerlaannarnissaa soqutigisaraa, tassami minnerunngitsumik Kalaallit Nunaata siunissaa eqqarsaatigalugu Issittumi sakkortusaartoqannginnissaa pingaarluinnarmat, Martin Lidegaard oqarpoq.

Aamma Issittoq namminerpiaq Amerikamiut nunat allat pillugit politikkianni pingaaruteqaqisoq tusagassiortup Martin Breumip uparuarpaa.

Issittumi russit sakkortusaarniarnerat Amerikamiunit isumakuluutigineqartoq isumaqartoqarsinnaavoq. Kisianni Kinap Issittumi suliniutiginiagaasa unitsinnissaannik USAp kissaateqarnera pingaartumik maluginiartariaqarpoq, Issittoq pillugu immikkut ilisimasalik Martin Breum oqarpoq.

Donald Trump Amerikamiut præsidentiisa Danmarkimut tikeraartut sisamaraat. 

Trumpip siulii pingasut Bill Clinton, George W. Bush aamma Barack Obama aamma taamaaliorput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat