Trump pillugu suliami eqqartuussisoq pinerluttuliornerarneqarluni politiinut eqqunngitsumik nalunaarutigineqartoq

Amerikami præsidentiusimasup, Donald Trumpip, 2020-mi USA-mi præsidentimut qinersisoqarmat qinersinerup inerneranik allanngortitseriaasimaneragaanera pillugu eqqartuussisup najugaqarfiani pinerluttuliortoqarneranik eqqunngitsumik sapaammi nalunaaruteqartoqarsimavoq.

Pinerluttuliortoqarnerarlugu politiinut eqqunngitsumik nalunaarutiginnitttoqartarneq Amerikami atugaaleraluttuinnarpoq.

Politiit oqarnerat naapertorlugu eqqartuussisup Tanya Chutkanip najugaqarfiani Washington DC-miittumi aallaasersortoqarnerarlugu politiinut sapaammi unnukkut nalunaaruteqartoqarnerata kingorna politiit eqqartuussisup Tanya Chutkanip najugaqarfianukarput. Politiillu nalunaarusiaat naapertorlugu taamaalinerani eqqartuussisoq angerlarsimasimanngilaq.

Pinerluttuliortoqarnerarlugu eqqunngitsumik politiinut nalunaarutiginnittoqartarnera siornatigut toqumik kinguneqartarsimavoq.

Naalagaaffimmi Kansasimi politiit 2017-imi inuk sunngitsoq aallaallugu toquppaat. Aamma angut 66-nik ukiulik 2020-mi uummamminik unittoorluni toquvoq, politiit aggersarneqarnerisa kingorna tupatsinneqarluni.

Amerikami tamarmi eqqartuussissunut sioorasaarisarnerit amerligaluttuinnarput.

Eqqartuussissoq Chutkan toqunniarlugu sioorasaarisoq arnaq nalagaaffimmi Texasimiittoq aggustimi tigusarineqarpoq unnerluuutigineqarlunilu.