Trump qinigassanngortissinnaajunnaarnissaminik apeqqutip eqqartuussivitsigoornerani najuunniartoq

Donald Trump - inatsisartut akuersisinnagit politikkikkut eqqartuussisulersuunneqarsinnaannginnerminik piaaffigineqarnini eqqartuussivimmut qulliunerusumut ingerlateqqitani suliarineqalerpat eqqartuussivimmi najuukkusuppoq. Trumpip USA-mi naalagaaffiit ilaanni præsidentissanut qinigassanngortissinnaaneranik eqqartuussiviit aalajangernikuunerat uani pineqarpoq.

Najuukkusunnini nammineq inuit internettikkut attaveqartarfiliamini Trump Socialimi allaaseraa.

Kingullermik Amerikap præsidentissaanut qinersisoqarmat, Joe Bidenip demokratit sinnerlugit qinigaasup 2020-mi ajugaanerata atortussaajunnaarsinneqarneranik Trumpip peqatigiinniapiloqatinilu suliaqarsimaneragaaneranik, kongressep sulineranik ajoqusiiniarneranik aamma Amerikami naalakkersuisunik peqquserluffiginnissimaneranik unnerluussinerit uani pineqarput.

Eqqartuussiviup aalajangigaa republikaneriusup Trumpip itigartinneqaqquaa, oqarluni siornatigut præsidentiusimasut inuiaqatigiinnut pingaarutilinnik suliaqartillutik iliuutsitsik pillugit eqqartuussisulersuunneqarneq ajortut.

Nunap immikkoortuisa ilaanni eqqartuussisoq, Tanya Chutkan, decembarimi aalajangerpoq, Donald Trumpip eqqartuussisulersuunneqarsinnaannginnera atorunnaassasoq, taamaattumillu qinersinermi peqquserluuteqarsimasutut sunniiniarsimasutullu eqqartuussivilersuunneqarsinnaassasoq.

Chutkanip aalajangiineranik eqqartuussisunut annerusunut Trumpip suliassanngortitseqqinnera, peqquserlussimaneranik eqqartuussiviup suliaanik 2024-mi marsimi aallartinneqartussaagaluamik kinguarsaaneruvoq.