Transparency: Qineqqusaarnermi akisussaaqataagit
Peqquserluttarnerup akiorniarnissaanut suliniuteqatigiiffik Transparency International Greenland, TIG, qineqqusaarnermut maanna akuliuppoq. Peqquserluttarnermut qanigisanillu salliutitsisarnermut naaggaarnissamik qinersisartunut kaammattuuteqarpoq, qinikkallu ammasumik innuttaasunillu peqataatitsillutik ingerlatsinissaannik qinersisartut piumasaqaateqaqqullugit.
Transparencymiilli erseqqissaatigineqarpoq nuna tamakkerlugu allagartarsuarnik nivinngartuititsigaluarluni qinersinermi qinerneqarsinnaanaviarani.
- TIG partiimik qinigassanngortittumilluunniit aalajangersimasumik tapersersugaqanngilaq. Taamaattorli peqquserluttuliortarneq qanigisanillu salliutitsisarneq pillugit isornartorsiusinnaassuseqartumik qinigassanngortittunut tamanut apeqquteqartarnissaannut qinersisartut kaammattorusuppagut. Aammattaaq partiinik qinigassanngortittunulli peqquserluttuliortarnermik pimoorussillutik akuersaanngitsunik aammalu ammasumik innuttaasunillu peqataatitsilluni ingerlatsinissamik qulakkeerinnikkusuttunik qinersisoqarnissaanik kaammattuuteqarpugut, Transparency Greenland Internationalimi siulittaasoq Anita Hoffer taama oqarpoq.
TIG-p paasititsiniaanera ullumi novembarip arfineq-aappaani aallartinneqassaaq, allagartarsuarnik nivinngartuisoqarlunilu postkortinik agguaasoqassalluni.
Peqquserluttarnerup akiorniarneqarnissaanik suliniaqatigiiffiup peqquserluttarnerup akiorniarneqarnissaa pillugu avammut nalunaaruteqarnissaq tamatuma kingorna sulissutiginiarpaa.
Kiisalu Transparency International Greenland qinersisartunik novembarip 19-iani ataatsimiititsiniarpoq, innuttaasunik peqataatitsineq tassani qulequtarineqassalluni.
