Aalisartut uumasulerisullu innersuussutaat naleqqussarlugit saarullittassiisoqartoq
- Atuisut ilisimasaat aammali uumasorsiuut ilisimasaat taakkua aallaavigalugit Naalakkersuisut aaqqissuussiniartarput. Tassanilu taanna aallaavigivarput, inuussutissarsiutip aallariarnissaa eqqarsaatigalugu taanna aalajangersimallutigu taanna taamatut inissisimassasoq, aalisarnermut, piniarnermut nunalerinermullu Naalakkersuisoq, Nikkulaat Jerimiassen.
Uumassusilerisulli piujuartitsinissaa ernummatigaat.
AAMMA ATUARUK Saarullittassiissutit nutaat
- Pinngortitaleriffimmit siunnersuisarnitsinni siunissamut isigaluta siunnersuisarpugut. Taamaattumik siunnersuinitsinnit annertunerusumik pisassiisoqarpat, taava aalisarnerup akilersinnaanerata innarlersinnaanera aamma qaninnerulersissinnaavaa, Pinngortitaleriffimmi aalisakkanut qalerualinnullu immikkoortortaqarfimmi pisortaq, Helle Siegstad oqarpoq.
Amerlassusaasali ikilinerat aalisartoq, Amos Marcussen naapertorlugu aalisapilunnermit pissuteqanngilaq, silali pissutaasarnerarpaa.
- Saarulliit takkuttarnerat nikerarpoq ukiumit ukiumut aamma piffissaq aalajangersimasoq takkuteriarlutik aamma piffissat ilaanni takkunneq ajorlutik. Immap kissassusaa apeqqutaatillugu ikileriartarlutillu amerleriartarput, Amos Marcussen oqarpoq.
AAMMA ATUARUK Saarullinnut meqqiliussat ujartorneqartut
Sinerissap qanittuani aappaagu saarullittarineqartut 25.000 tonsiunissaat Naalakkersuisut naatsorsuutigaat.
Pinngortitaleriffiulli tassa saarullittassat taama amerlatigisut siunissami aalisarneqarnissaat akilersinnaajunnaarnissaa ernumassutigaa aalisakkammi ikilingaatsiarsimassammata.
Saarullinniartartulli tamanna ernummatiginngilaa.
- Uanga isumaqarpunga naamik ulorianartorsiortitsinata. Tassami suli saarullilissuuvoq. Saarulliillu anginatillu mikinatillu, Amos Marcussen oqarpoq.
Naalli Pinngortitaleriffiup innersuussutaanit pisassiissuteqarnerugaluarlutik Naalakkersuisut Pinngortitaleriffiup innersuussuteqartarnera pingaartippaat.
AAMMA ATUARUK Qaleralittassiissutit uumassusilerisut inassutigisaannut naleqqussarniaraat
- Taamatut oqarsinnaanngilanga. Pisariaqartippagut ukua misissuinerit eqqarsaatigalugit. Kisianni tassa taamatut ingerlaavartoqartussaassooq manna nuna taamatut inuussutissarsiummik aalisarnikkut piniarnikullu pingaarnerpaamik ingerlatitsitillugu, Nikkulaat Jerimiassen oqarpoq.
Saarullittassiissutigineqartuni 30.000 tonsiusuni 28.500 tonsit inuussutissarsiutigalugu aalisartunut kiisalu 1.500 tonsit sunngiffimmi aalisartunut agguarneqarput.
