Efterskolit peqatigiiffiat: Atuarnerup naammassinissaa pingaaruteqarpoq
- Suliamik annertuumik aallartitsigaangatta sianissutsikkut naammassisaqarnissatinnik pisariaqartitsisartugut isumaqarpunga. Kalaallillu inuusuttut Danmarkimukarlutik efterskoleriartortut angisoorujussuarmik suliaqartarput. Ukiorlu ataaseq taamaattoq ajunnginnerpaamik ingerlannissaa naammassinissaalu pingaaruteqarpoq.
Efterskolit peqatigiiffianni siulittaasoq, Torben Vind Rasmussen oqarpoq.
Taassuma inuusuttut amerlasuut nunatsinniiginnarlutik Danmarkimut efterskolernertik naammassiartornianngimmassuk uggoraa.
AAMMA ATUARUK Kalaallit inuusuttut efterskolernerminnik corona pissutigalugu matusinerup kingorna unitsitsisut
Efterskolit coronap kingunerisaanik qaammatinik marlunni matoqqapput, taakkuli ataasinngormat ammaqqillutik. Inuusuttut maanna 82-iusut nunatsinniiginnarlutik efterskolerfigisaminnut uteqqinnianngillat. Taakkulu atuarnerminnik naammassinnilluarnissaminnut periarfissaq annaagaat siulittaasoq oqarpoq.
- Taamaammat aasaanera takisinnaavoq eqqarsaatigalugulu: Tassa, allamik soqanngila imaluunniit ikinngutigilersimasatta qanoq attaveqarfigiinnassavakka? Naammassinnilluanngikkaannilu tamanna ajornakusoorsinnaasoq isumaqarpunga, siulittaasoq oqarpoq.
Taamaatitsisoqangaatsiartoq
Efterskolit matoqqagallalernerata kingunerisaanik kalaallinit inuusuttunit 150-iusunit 68-iinnaat efterskolernertik nangikkiartoqqinniarpaat.
Ukiup atuarfiusup naammassinissaanut sapaatit-akunneri arfiniliinnanngoreersullu atuartut tamarmik uteqqinnissaat siulittasup naatsorsuutigisimanngilaa. Taamali amerlatiginerat siulittaasup tupaallaatigaa.
- Taama amerlatigisut sapaatini akunnerni arfinilinni Danmarkimiikkiartoqqinnginnerat ajusaarutigingaatsiarpara. Sapaatimmi akunneri arfinillit ataatsimoorfiusumukaqqinneq angusaqarfiungaatsiarsinnaasoraara.
AAMMA ATUARUK Danmarkimi efterskolertut: Ikinngutivut maqaasivagut - Brugsenimillu ujariatsilluta
Atuartut efterskolimi 9. klassertut nalinginnaasumik misilitsittarput. Coronalli ajornartorsiortitsinera pissutigalugu ukioq manna misilitsinnissat tamarmik taamaatiinnarneqarput. Tassungalu taarsiullugu ukioq manna angusat atorneqartussaallutik.
Naalli atuartut sapaatini-akunnerni arfinilinni peqataallutik naammassinninngikkaluartut atuarfinnit ataasiakkaanit atuartut ilinniaqqinnissaminnut periarfissagissaartinneqarnissaat Torben Vind Rasmussenip neriuutigaa.
