Danmarkimi efterskolertut: Ikinngutivut maqaasivagut - Brugsenimillu ujariatsilluta

Nunatsinniit Danmarkimi Galtrup Efterskolemi atuartut 34-t sapaatit akunnerini arfineq-pingasuni angerlarsimaannaqqusaasimapput.
Jyllandip avannaani Galtrup Efterskolimi inersuaq piffissami matumani inoqanngitsupilussuuvoq. Kalaallinit atuartunit 34-nit atuarfimmiiginnartuni Jørgen Peter Jonassen Paamiuneersoq (saamimmi) Stevie Olsen Larsen Sisimiuneersoq Paarnannguaq Samuelsenilu Qasiannguaneersoq (talerpimmi) ilaapput. Assi © : KNR
Nunatsinniit Galtrup Efterskolemi atuartut atuaqatitik nunatsinnukarsimasut maqaaseqaat. Hans Olsvig Ilulissaneersoq (saamerleq), Inutsiaq Olsen aamma Ilulissaneersoq Petra Kruselu Uummannameersoq (talerperleq) taama oqarput. Assi © : KNR
Nunatsinniit atuartut ulluinnarni atugaat allanngorsimagaluartut qiimajuarsinnartut, Galtrup Efterskolemi matematikkertitsisoq, Enok Skifte, isumaqarpoq. Assi © : KNR
Galtrup Efterskolimi forstanderip, Jens Hvidip kalaallit atuarfimmiittut Danmarkimi efterskolertunit iluatsitsinerpaasut erseqqissaatigaa, efterskolertulli allat tamarmik qaammat ataaseq sinnerlugu atuarfimmiissimanngillat. Assi © : KNR
Nerisarfimmi issiaviit atorneqartut avissaaqqaqaat. Galtrup Efterskolimi atuartut amerlanerpaartaat marsip qeqqanili angerlarsimalerput. Assi © : KNR
Ilinniartitsisup Maj Blazejewiczip kalaallit danskisut atuartikkai. Uani Stevie Olsen Sisimiuneersoq Petra Kruselu Uummannameersoq ikiorpai. Assi © : KNR
Galtrup Efterskolimi paarlersuit inoqanngivipput, atuartummi 140-sut amerlanerpaartaat angerlarsimaannarput. Assi © : KNR
Assi © : KNR
Assi © : KNR
Allattoq Helle Nørrelund Sørensen
maajip 09-at 2020 11:26
Nutserisoq Hanne Petersen, Connie Fontain

- Isumaqarlunga utaqqinerput sivisunavianngitsoq. Taava atuarfik ammaqqippoq.

Danskit ministeriunerata, Mette Frederiksenip (S), Danmarkimi atuarfiit tamarmik marsip qiteqqunnerani matummagit, Inutsiaq Olsen Ilulissaneersoq ernumarpianngilaq. Atuarfiit coronavirusi peqqutigalugu sapaatit akunnerini marlunni matoqqasussanngorput.

Jyllandip avannarpasissuani Galtrup Efterskolemi danskit atuartut 90-t angerlarammata Inutsiaq Olsen eqqarsarsimavoq, Københavnikkoorluni Ilulissanukariarluni utimut aqqussua sivisuallaassasoq.

- Timmisartoqattaarusunnginnama tamaaniiginnarpunga, Inutsiaq Olsen oqarpoq.

Assi © : KNR

Nunatsinniit Galtrup Efterskolemi atuartut 49-t arlallit Inutsiaq Olsenitulli eqqarsarsimapput, taakku ilagaat Paarnannguaq Samuelsen Qasigiannguaneersoq:

- Tamaaniiginnarusussimavugut, taanna oqarpoq.

Sapaatit akunnerili marluk sapaatit akunnerinut sisamanut - kingornalu arfineq-pingasunut sivitsorneqarput.

Tassami Inutsiaq, Paarnannguaq nunatsinneersullu allat 34-t kisiartaallutik Galtrup Efterskolemi qaammat ataaseq affarlu atuarput. Danmarkimimi tamarmi efterskolertuni kisiartaallutik efterskolemi suli najugaqarlutillu atuarput.

Efterskolemili tassani kalaallit atuartut katillutik 50-iusuni 16-it timmisartumik angallannerup inerteqqutigineqalinnginnerani nunatsinnukarput.

Atuartitsinissat taamaatiinnarneqartut atuarfiillu mattunneqartut

Paarnannguaq Samuelsenip, Inutsiaq Olsenip Galtrup Efterskolemiluunniit atuartut allat KNR-ip naapitaasa atuarfimmiiginnarsimanertik uggorinngilaat. Tamanna naak ulluinnatik allanngoraluartut.

Atuartut Danmarkimi nunatsinnilu nalunaaquttap assigiinnginnera pissutigalugu ikinngutiminnut ilaquttaminnullu unnukkut sianersinnaasarniassagamik pigaarnerusinnaatinneqarput. Taamaammat qulinut aatsaat ullaakkorsiortoqartarpoq, atuartitsinerillu tamatuma kingorna aallartittarlutik.

Atuartitsissutilli ilaatigut nipilersorneq, eqaarsaarneq atuartitsissutillu toqqarneqarsinnaasut taamaatinneqarput. Atuartitsissutillu kisitsineq, danskisut tuluttullu kiserngorullutik. Tamatuma saniatigut ullaakkut erinarsoqatigiittarneq, oqaluarneq, tusarnaartitsinerit ataatsimullu sammisassaqartitsinerit allat aamma taamaatinneqarlutik.

Assi © : KNR

Aamma atuarfiup avataanut angalaarnerit coronavirusip atuarfimmut eqqunneqannginnissaa pissutigalugu aamma taamaatinneqarput.

- Corona pissutigalugu Brugseniliarsinnaannginnatta atuarfimmi pisiarfeeraqarpugut, Stevie Olsen Sisimiuneersoq KNR-imut atuarfimmik takutitsisoq oqarpoq.

Atuareernerup kingorna atuarfiup eqaarsaartarfianut, e-sportertarfianut, ilusilersuiffianut sammisassaqarfianullu allanut isersinnaasoqartarpoq. Immikkulli ittumik eqqiaasoqarnissaa assanullu tunillannartuiaammik atuisoqarnissaa pisariaqarpoq. Atuartullu ilinniartitsisunut atuarfimmi najugaqanngitsunut, bakterianik nutaanik atuarfimmut eqqussisinnaasunut 2 meterimik ungasitsiginiarsarisarput.

Atuartulli ilinniartitsisulluunniit napparsimanermut ersiuteqarsimanngillat.

Atuartunulli allanut maqaasineq ajornerpaasimavoq. Annermik taakku sapaatini akunnerni qassiiusuni Atlantikup Avannaata illuatungaaniimmata.

- Atuartut kalaallit maqaasinerpaavagut, Stevie Olsen oqarpoq.

Efterskolit ammaqqissinnaasut

Allanngoriartortoqarporli.

6. klassimiit 10. klassimut atuartut ataasinngorpamit atuariartoqqissinnaalissasut ministeriunerup, Mette Frederiksenip maanna nalunaarutigaa. Galtrup Efterskolellu atuartut tamarmik iserteqqinnissaat piareersimaffigaa, malittarisassarpassuanngussappulli, forstanderi, Jens Hvid oqarpoq.

- Eqimattani ilaqutariini sulisassaagut atuartullu najugaqatigisatik ulluinnarni ilagisassavaat. Ilinniartitsisullu naapitaat aamma ikinnerussallutik. Amerlasuutillugit ataatsimoortissagutsigit sillimaniarnikkut imminnut ungasillisimaassapput.

Danmarkimilu upernarmat taamaaliortoqarsinnaasoq, taanna oqarpoq.


 

Matusineq: Kalaallit danskit efterskoliini atuartut:

  • Marsip 11-at: Danskit naalakkersuisuisa Danmarkimi atuarfiit tamarmik sapaatini akunnerni marlunni matuaat. Atuartut angerlarsinnaanngitsut efterskoliniiginnarlutik atuartinneqaannarsinnaapput
  • Marsip 12-iat: Naalakkersuisut kalaallit danskit efterskoliini atuartut ilaqutarsiaminnukanngikkunik atuarfimmiiginnaqquaat
  • Marsip 14-iat: Naalakkersuisut kalaallit danskit efterskoliini atuartut angerlarnissaminnik qinnuteqarunik angerlarsinnaasut paasissutissiissutigaat
  • Marsip 23-at: Danskit naalakkersuisuisa danskit atuarfiisa matoqqatinneqarnerat apriilip ulluisa 14-iannut sivitsorpaat
  • Apriilip 6-iat: Danskit naalakkersuisuisa Danmarkimi 9. aamma 10. klassimi atuartut misilitsinnissaat tamarmik taamaatiinnarpaat, danskillu atuarfiisa matoqqatinneqarnerat maajip ulluisa 18-iannut sivitsorlugu.

Aamma atuaruk