Kalaallit inuusuttut efterskolernerminnik corona pissutigalugu matusinerup kingorna unitsitsisut
Sisamanngorpat – Qilaliarfimmi – timmisartoq kalaallinik efterskolertunik ilaasoqarluni Københavnip mittarfianut danskit nalunaaqutaat naapertorlugu 21.30 tikissaaq.
Tamanna Namminersorlutik Oqartussat Danmarkimilu Kalaallit Illuutaasa kalaallinik Danmarkimi ilinniartunik utertitseqqinniartunik amerlasuunik katersuiniarnerisa kingunerisaanik pissaaq.
AAMMA ATUARUK Naalakkersuisut: Inuusuttut Danmarkimut ilinniarfimminnukaqqissinnaapput
Danskit efterskolii ataasinngormat coronap ajornartorsiortitsineranit qaammatini marlunni matoqqareerlutik ammaqqipput.
Kalaallilli efterskolertut maannamut 82-it nunatsinniiginnarniarlutik aalajangerpaat, taamaalillutillu Danmarkimi atuarnerminnik naammassinnissinnaanatik.
Namminersorlutik Oqartussat ataanni Ilinniartitaanermut Aqutsisoqarfik KNR-imut taama paasissutissiivoq.
Kalaallinit inuusuttunit Danmarkimit nunatsinnut angerlarniarlutik aalajangersimasunit 150-init 68-iinnaat efterskoleriaqqinniarput. Taakkunannga marluk nunatsinniiginnarlutik efterskolimit alisissumit ilinniartinneqassapput.
Sapaatit akunnerata tulliani timmisartuussisoqaqqilissasoq
Atuartulli ilaat Danmarkimukaqqillutik efterskolernerminnik nangitserusuttut ilaat Kangerlussuarmut sisamanngornerutinnagu apuussinnaanngillat. Tamanna nunatta iluani timmisartukkut angallannerup nalinginnaasumit annikinneruneranit pingaartumik pissuteqarpoq.
Taakkuli Air Greenlandip Københavnimut sapaatit akunnerata tulliani marlunngornermi angalasinnaanngoqqinnerani angalanissamut periarfissaqassasut, Ilinniartitaanermut Aqutsisoqarfik KNR-imut paasissutissiivoq.
AAMMA ATUARUK Matusineq: Atuartut atuarnikissimapput
Ilaqutariit ilaasa meeqqatik Kalaallit Illuutaat Namminersornerullutik Oqartussallu avaqqullugit timmisartukkut billetsersinikuuaat. Taakku efterskolertitsinissamut aningaasatigut taperneqarsimagunik timmisartukkut angalanissamut aningaasartuutitik Namminersorlutik Oqartussanit utertissinnaavaat.
Kalaallit inuusuttut katillugit 225-t Danmarkimi ukioq 2019-2020 efterskolertutut allattorsimapput. Ilinniartitaanermut Aqutsisoqarfimmiilli naatsorsuinerit kingulliit naapertorlugit 143-naat Danmarkimi atuarnerminnik naammassinninniartutut nalunaarsorsimapput.
Kalaallit danskit efterskoliini atuartut amerlanerpaartaasa nunatsinni meeqqat atuarfiat naammassereernikuuaat.
