Danmarkimi efterskolit qaammatini marlunni matoqqapput. Tamassuma kingunerisaanik atuartut 150 missaanniittut ilaquttaminnut angerlarallarput. Danmarkimi Galtrup Efterskolemi (asseq) matoqqagallarnermi, atuartunut angerlarallartunut internetikkut atuartitsisoqarpoq. Assi: KNR

Matusineq: Atuartut atuarnikissimapput

Kalaallit inuusuttut ilaasa atuakkatik Danmarkimi efterskolit matoqqanerini qiviarpiarsimanngilaat ilaasalu qivianngivissimallugit. Danmarkimi efterskolit peqatigiiffiata tamanna maluginiarpaat.

Kalaallit inuusuttut amerlasuut Danmarkimi efterskolertut qaammatini kingullerni marlunni atuarnerat killeqarsimavoq ilaallu atuarsimanatik.

Tamanna Galtrup Efterskolemi Jyllandip avannaaniittumi kalaallinik ulluinnarni 50-inik atuartoqartumi nalaassimavaat. 

Taakkunani atuartut 21-t nunatsinnut uternissartik toqqarsimavaat. Atuartut atuarfimmiiginnartut ullut tamaasa atuartinneqartarsimapput.  

Nunatsinnukarallartut nalunaaqutaannut akunnerit sisamanik kingulliusumut naleqqussakkamik, internetikkut atuartitaanissamik neqeroorfigineqarput.

AAMMA ATUARUK Naalakkersuisut: Inuusuttut Danmarkimut ilinniarfimminnukaqqissinnaapput

Atuartulli ataasiakkaat internetikkut atuarnertik unitsissimagaat, Galtrup Efterskolemi kalaallinut atuartunut matematikkertitsisoq, Enok Skifte oqaluttuarpoq.

- Ilaat tusarfigerpianngilakka. Sapaatip akunneranut suliassanik tunineqartaraluarlutik utertitsisanngillat, Enok skifte oqaluttuarpoq. 

Atuartut ilaasa ilaquttaminni internetikkut attavilunnertik peqqutigivaat. Ilaasalu efterskoli qimaqqallugu atuarnissamut piumassuseqarsimanngillat.

Galtrup Efterskolemi atuartut angerlarallarnikut ilaasa meeqqat atuarfiini atuaqatiminnut uternissartik qinerpaat, allallu Majoriami atualersimallutik.  

 Galtrup Efterskolemi pisortaq, Jens Hvid, oqarnera naapertorlugu, atuarfiup taamaammat atuartut atuagarsornerat salliutinnagu tarnikkut atugaat eqqumaffiginerusimagaa.

Qaammatit marluk atuarsimannginneq malunniuttoq

 

Kalaallit efterskolertut amerlanersaat internetikkut atuartitaanermi peqataasarsimasut, Danmarkimi efterskolit peqatigiiffianniit isumaqarput.

Efterskolit peqatigiiffianneersoq, Danmarkimilu efterskolinut kalaallinik atuartuutilinnut attaveqartarsimasoq, Maren Ottar Hessner taama oqarpoq. 

Kalaallit efterskolertut atuarnerminni qanoq ingerlanersut internetikkut Danmarkip matugallarneraniit sapaatit akunneri siulliit marluk qaangiuttut apeqqarissaarfigisimavai.  

- Maluginiakkakka malillugit affaasa missaat malinnaaput. Amerlangaatsiarput malinnaalluartarput, Maren Ottar Hessner oqarpoq.

AAMMA ATUARUK Danmarkimi efterskolertut: Ikinngutivut maqaasivagut - Brugsenimillu ujariatsilluta

Arlalinnillu unammillernartoqarsimavoq, soorlu ilaquttani internetikkut attavilunneq kiisalu piumassusikippallaarneq.

- Maluginiarpara kalaallit qallunaallu tamarmik akornanni atuartut ilaat piffissami matumani oqittorsiorpallaarsimasut. Peqqutit assigiinngitsuusinnaapput, aammali atuartunut ataasiakkaanut immikkuullarissumik ilisimanngisatsinnilli tunngasuusinnaallutik, Maren Ottar Hessner oqarpoq.

Kalaallit efterskolertut Danmarkimut atuarnertik naammassiartorsinnaagaat, Naalakkersuisut marlunngormat nalunaaruteqarput. 

Oqaatsitigut piginnaasat eqqugaasut

Kalaallit amerlanersaat Danmarkimut efterskoleriartinnatik meeqqat atuarfianni soraarummeereersimasuusarput. 

Qaammatinilu marlunni matoqqaneq ilinniaqqinnissamut kinguneqarujussuarnavianngilaq. Matoqqatitsinerli atuartut inerisimassusaannut kinguneqarsinnaasoq, Maren Ottar Hessner isumaqarpoq.

- Kalaallit inuusuttut amerlanerit Danmarkimut efterskoleriartarput qallunaatut oqaatsinut pikkorissarniarlutik ilaannilu misilitsissutit inernerinik qaffassaaniarlutik. Angerlarsimaffilli qimallugu inuunermik aamma sungiusarneruvoq. 

AAMMA ATUARUK Eksamener i 9. og 10. klasse i Danmark er aflyst

Tamatumanilu qaammatini marlunni atuanngitsoorneq isumalerujussuusinnaavoq, Maren Ottar Hessner isumaqarpoq. 

- Peqataasarsimanngikkaanni qallunaatut oqaatsitigut ineriartornermut soorunami sunniuteqassaaq. Ilinniaqqiffissaminnut ingerlaqqilerpata soorunami tamanna aamma ilinniarsinnaanermut oqaatsinillu atuisinnaanermut sunniuteqassaaq, efterskolit peqatigiiffianneersoq Maren Ottar Hessner isumaqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat