Toqutseriaraluarneq ukiuni tallimani pineqatissiissutigaa
Angut 32-nik ukiulik ilaatigut toqutseriarsimasutut pingasunngornermi unnerluutigineqarpoq, taama Kalaallit Nunaata Politiivi tusagassiorfinnut sisamanngornermi nalunaarutigaat.
Angutip arnaanni igasut savisssua atorlugu siorna juulimi saassuppaa. Kilerlugulu kapivaa, arnarlu eqqaamiuminnut qimaagami, taassuma ikiueqqaarnermigut arnap inuunera annaappaa, allapput.
Angut tigusarineqarami 70.000 koruuniuteqarpoq, taakkuuppullu angutip allanik pinerluuteqarsimasinnaanerannik misissuinernik aallartissutaasuut.
Misissuinerit takutippaat, inuit arlallit angummut aningaasanik 500.000 koruunit tungaannut amerlassusilinnik nuussisarsimasut.
Nuussinerit sumut tunngasuunerat angutip nassuiaatigisinnaasimanngilaa.
Sermersuup Eqqartuussiviata angut maajimi 2023-mi suliani unnerluussutini tamani – imminik iluanaarniartissimasutut suliaq minillugu – pisuutinneqarpoq ukiunilu sisamani affarmilu pineqaatissinneqarsimasunut inissiisarfimmiitttussanngortitaalluni.
Nunatta Eqqartuussiviata pisuutippaa
Nunatta Eqqartuussiviata unnerluussummi pasilliutinut tamanut atatillugu angut pisuusutut eqqartuuppaa.
- Savissuaq atorlugu inummik allamik sakiaatigut kapisineq, toqutseriarneruvoq. Tamanna qularutiginngilarput, taamaatttumik nuannaarutigaarput Sermersuup Eqqartuussiviata unnerluussutaa aamma Nunatta Eqqartuussiviata assinganik naliliiffigimmagu, unnerluussisussaatitaasoq Cecilie Stürup Sørensen politiiniit tusagassiorfinnut nalunaaruteqarnermi oqarpoq.
Imminik iluanaarniartinnissimasutut pineqaatissinneqarnissaanik suliami Sermersuup Eqqartuussiviata pinngitsuutitsinera Nunatta Eqqartuussiviata allatut naliliiffigaa.
- Aningaasat pineqartut amerlaqaat, suminngaanneerneri uppernarsaatissaqanngitsut, taamaammat pinerluttoqarsimanera pasinarluinnarpoq.
Angut ukiuni tallimani pineqaatisinneqarsimasunut inissiisarfimmiittussanngortitaasoq, politiit nalunaarutigaat.
