Angut 46-nik ukiulik Arsummi toqutsisimasutut ukiuni arfinilinni pineqaatissinneqartoq
Angummik 58-inik ukiulimmik Arsummi siorna toqutsisimasutut unnerluussaq, Eqqartuussiveqarfik Sermersuup ippassaq sisamanngornermi eqqartuuppaa.
Kalaallit Nunaanni Politiit tusagassiorfinnut taama nalunaarput.
Angut 46-nik toqutsisimasutut eqqartuussaasoq angutip toqungasup Arsummi nunap qaani nassaarineqarnerata aqaguani tigusaavoq.
Angutip taassuma angut 58-inik ukiulik guitarimik niaquagut siullermik anaariarlugu tigullugu matu silarlermiit majuartarfinnut ajassimavaa.
- Majuartarfikkut nakkakattarneq pinngitsoornani toqqutaasanngilaq, taamaammallu unnerluussap nakuuserfigisami toqorataannaaneranik ilisimannissimanissaata uppernarsarniarnera imaannaanngeqaaq. Nakuuserneratali peqqarniissusia ulorianassusialu qiviaraanni unnerluussap nakuuserfigisami toqorataannaaneranik ilisimannissimanissaa qularnaatsoq eqqartuussivillu isumaqarpugut, unnerluussisoq Alexander Stürup oqartoq Kalaallit Nunaanni Politiit tusagassiorfinnut nalunaarutaanni allaqqavoq.
Toqutsineq pilersaarusioqqissaagaanngitsoq
Toqutsisutut eqqartuussat ukiuni arfineq-marlunni pineqaatissinneqakkajupput, sivikinnerusumilli pineqaatissinnissamut arlalinnik illersuisoq unnerluussisorlu tunngavilersuimmata, eqqartuussiveqarfiup ukiuni arfiniliinnarni pineqaatissikkaa, Kalaallit Nunaanni Politiit ilisimatitsipput.
- Toqutsineq pilersaarusioqqissaagaanngilaq, kisianni unnerluussap toqutaasullu pagginnerisa sakkortuseriarsimanera toqumik kinguneqarpoq, Alexander Stürup oqarpoq erseqissaallunilu:
- Unnerluussalli nakuuserfigisani 58-inik ukiulik ajoqusersimaqisoq paasigamiuk sapinngisamik annanniaraluarsimavaa. Tamanna sivikinnerusumik pineqaatissinneqarneranut tunngavissiivoq, eqqartuussivillu tamatumani isumaqataavoq.
Eqqartuussut unnerluussisuussaatitaasut eqartuussaasullu 46-inik ukiullip akueraat, eqqartuussaaasorlu taamaalilluni pineqaatissinneqarsimasunut inissiisarfimmiilereerpoq.
