Tjekkiami aallaasersortoqarnerata kingunerisaanik nuna tamakkerlugu arfinngornermi aliasuttoqassaaq
Tjekkiami illoqarfiit pingaarnersaanni Pragimi aallaasersortoqarnerani toqutaasut eqqaaniarniarlugit nuna tamakkerlugu arfininngorpat aliasuttoqassaaq.
Tamanna Tjekkiami naalakkersuisut præsidentip ilaatigut peqataaffigisaani ataatsimiinnerminni aalajangerpaat.
Reuters taama allaaserisaqarpoq.
- Inuusuttorpassuit pisariaqanngitsumik annaanerat pillugu aliasungaatsiarnera ikiorfeqanngitsumillu kamassimanera takutikkusuppara, Petr Pavel oqarpoq.
Tjekkiami ilinniartut ilaat 24-nik ukiulik Pragimi ilisimatusarfimmi ilinniartut 14-it aallaallugit toqppai. Taassuma saniatigut 25-t allat ikilerneqarput, taakkunannga qulit perulullutik.
Karls Universitetimi ilinniartut ilaat 24-nik ukiulik aallaasersortoq politiit nalunaarutigaat.
Aallaasersortup timaa ilisimatusarfimmi nassaarineqarpoq. Imminut toqussimanersoq politiiniilluunniit aallaaneqarsimanersoq ilisimaneqanngilaq.
Aallasersornissaq pilersaarusiorneqarsimasoq politiit oqaatigaat, nunanilu allani saassussinernit allanit isumassarsinikkut aallaasersortoqartoqarunartoq Pragimi politiit pisortaata oqaatigaa.
- Ruslandimi ukiap ingerlanerani saassussinerit ilaannit isumassarsinikkut saassussisoqartoq paasissutissat inoqatinut attaveqaqatigiiittarfinneersut uppernarsineqanngitsut aallaavigalugit paasivarput, politiit pisortaat oqarpoq.
Tjekkkiami aatsaat taama alianartigisumik pisoqartoq Tjekkiap præsidentiata oqaatigaa.