Illersornissamut ministeri: Timmisartut malersuutit Kalaallit Nunaanni pisariaqartinneqalersinnaapput
Aviisi Berlingske taama allaaserisaqarpoq.
Rusland issittumi sakkutooqarfinnik sanaartuleruttorpoq, ilaatigut timmisartunik malersuutinik qeqertami Nagurskoyemi Svalbardip kangisinnerusortaaniittussanik Kalaallit Nunaannit 1.000 kilometerisut ungasitsigisumiittumi.
Tassanngaanniit russit timmisartui Kalaallit Nunaata qulaanut assersuutigalugu Pituffimmut ingerlaarsinnaapput.
Illersornissamut ministerip tamanna missisorniarpaa nalilersorlugulu.
AAMMA ATUARUK Illersornissaqarfik Folketingimit amerlanerusunik aningaasaliiffigineqartoq
- Danskit naalagaaffiata silaannartaani unioqqutitsinerit akuersaarsinnaanngilagut. Oqartussaaffigut illersortariaqarpagut, soorlu Østersøen russinit eqqunngitsuliorfigneqarpat Danmark illersuisariaqartartoq. Taassuma assinganik Kalaallit Nunaanni iliuuseqartariaqarput, Claus Hjort Frederiksen oqarpoq.
Russit timmisartui unioqqutitsillutik Kalaallit Nunaata silaannartaanut pigaluarpata danskit sakkutuuisa timmisartuinik russit timmisartuinik peeqqusisinnaasunik peqaranilu nakkutilliivimmik Kalaallit Nunaata silaannartaannik illersuisussamik peqanngilaq.
AAMMA ATUARUK Danmarkip timmisartuutai malersuutit Islandip silaannartaanik illersueqataalersut
Kalaallit Nunaata nakkutigineqarnerata qaammataasiat atorlugit annertusineqarnissaa Folketingimi 2016-mi aalajangerneqarpoq.
Aviisip Beringskip allaaserisaa naapertorlugu, russit sakkutuuisa timmisartui saassussisartut aamma qaartartullit 184-it Danmarkip silaannartaanut pisut imaluunniit qanillattortut 2013-miilli peersinneqarsimapput.