Danmarkip timmisartuutai malersuutit Islandip silaannartaanik illersueqataalersut
Danmarkip timmisartuutai malersuutit maanna Islandiliartinneqalerput, Islandip silaannartaanik illersueqataanissaannut ilaassallutik.
Islandip silaannartaanik illersueqataasinnaanissamut periarfissaq, Folketingip nunanut allanut tunngasunut ataatsimiittartuini eqqartorneqareersorlu Danmarkip nunanut allanut tunngasunut ministereqarfia taama ilisimatitsissuteqarpoq.
- Islandip silaannartaata nakkutigineqarlunilu illersorneqarneratigut, Nunat killiit illersoqatigiivisa NATO-p sinnerlugu pisussaaffipput eqquutsipparput, Ruslandip iliuuseqaratarsinnaanera pinngitsoortinniarsarisinnaassallutigu, illersornissamut ministeri Claus Hjorth Frederiksen oqarpoq.
AAMMA ATUARUK Kalaallit inuusuttut sakkutuujusussaanermut nammineq nalunaarsinnaanngussapput
Danmark, Islandip silaannartaanik 2009-mili sisamassaa nakkutiginneqataalerpoq. Nunammi NATO-mi ilaasortaasut silaannartaasa illersorneqarnissaannut ataatsimoorussaralugu suleqatigiinnerannut tamanna ilaalluni.
Islandimik ikiuineq apriilimi sapaatip-akunnerini marlunni pisussatut pilersaarutigineqarpoq, Danmarkip timmisartui malersuutit F-16-it sisamat, inuillu 60-it missaanniittut, Islandip illersorneqarnissaanut peqataassallutik.
AAMMA ATUARUK Politiit qarasaasiakkullu isumannaallisaaneq illersornissaq pillugu isumaqatigiissummi nukittorsarneqartut
Danmark Estlandimi ukioq manna aamma sakkutuuliivoq, timmisartunillu malersuutinik aamma inissisimatitaqarluni. Ruslandip Estlandimik, Baltikumimilu nunanik allanik saassusseratarsinnaanera uani pinngitsoortinniarneqarpoq, saassussissappallu illersueqataasoqarnissaa siunertaalluni.