Politiit qarasaasiakkullu isumannaallisaaneq illersornissaq pillugu isumaqatigiissummi nukittorsarneqartut
Danskit naalakkersuisui illersornissaq pillugu ullumi isumaqatigiissuteqarput, illersornissaqarfimmut 12,8 milliardit koruuninik aningaasaliinissamik imalimmik. Suliassaqarfimmut missingersuusiami aningaasaliissutissat sorsunnerup nillertup nalaaniilli aatsaat ilaneqavipput.
AAMMA ATUARUK Aaja: Illersornissaqarfik aningaasanik amerlanernik pisariaqartitsivoq
- Nunatsinnut iligisatsinnullu aarlerinartoqariartuaarnera isiginngitsuusaaginnarsinnaanngilarput. Immitsinnut illersornissatsinnut piumassuseqarnerput nukissaqarnerpullu takutittariaqarparput, ministeriuneq Lars Løkke Rasmussen (V) illersornissaq pillugu isumaqatigiissut pillugu allappoq.
Ilaatigut qarasaasiakkut isumannaallisaanermut 500 millionit koruuninik immikkoortitsisoqarpoq, 500-nillu amerlanerusunik siunissami sakkutuujusussaatitaasoqassaaq. Taamatullu pingaarnersiuisoqarnera illersornissaqarfiup suliaanut sunniuteqassasoq, illersornissamut politikkimut ilisimatooq Mikkel Vedby Rasmussen isumaqarpoq.
AAMMA ATUARUK Illersornissaq pillugu pilersaarut danskit naalakkersuisuisa saqqummiutileraat
Danskit illersornissaqarfiata suliassai allanngortut
Sakkutuut Danmarkimi nunanilu eqqaaniittuni najuunnerunissaannut illersornissaq pillugu isumaqatigiissut ammaassisoq ilisimatuup oqaatigaa. Illersornissaqarfik Danmarkimit ungasissuniittuinnarni suliaqartarunnaarpoq.
- Illersornissaqarfiup Afghanistanimi Syriamiluunniit pisunik suliaqartariarluni aamma Danmarkimi nakkutilliinermik qarasaasiakkullu isumannaallisaanermik suliaqartalissaaq, taanna oqarpoq.
Qarasaasiakkut isumannaallisaanerup sakkutuujusussaatitaasoqarnerunissallu saniatigut ministeriuneqarfiup aarlerinartoq alla eqqumaffigaa.
- Ruslandimit alliartortumik aarlerinartoqavippoq, taamaammat aalajangeriataallaqqissusermik takutitsisariaqarpugut. Aalajangeriataallaqqittuuvugullu. Taamaammat aarlerinartut nalinginnaasut qarasaasiakkullu aarlerinartut akiorniarlugit illersornissaqarfiup malunnartumik nukittorsarnissaa iluatsikkatsigu nuannaarutigaara, ministeriuneq allappoq.
Nato-p anguniagaanut qanilliartortut
Partiit isumaqatigiissummut nutaamut 2023-p tungaanut atuuttussamut isumaqatigiissuteqartuusut tassaapput Venstre, Liberal Alliance, De Konservative, Dansk Folkeparti, Socialdemokratiet De Radikalelu.
Aamma nunani tamalaani ataqatigiissaakkamik suliaqarnernut aningaasatigut sinaakkutissaritinneqartoq 50 procentimik 2023-mut allineqarpoq.
Aningaasaqarnermut ministereqarfiup naatsorsuinera naapertorlugu, Danmarkip illersornissaqarfimmut BNP-mi 1,17 procentia siornatigut atortariarlugu 1,3 procentia maanna atortalerpaa.
Nunat NATO-mut ilaasortat BNP-mik 2,0 procentii illersornissamut atortarnissaat NATO-p anguniagarigaluarpaa. Anguniagaq taanna Danmarkimit tapersersorneqarpoq.
