Timmisartumut ilaasut sukannernerusumik isumannaallisaavigineqarnissat pinngitsoortinneqapoq
Tamanna pisimanngikkaluarpat timmisartumik Danmark-imit nunatsinnut angalasut siunissami Kastrup-imi timmisartunut ilaasut utaqqisarfianit bus-inik ilaallutik timmisartunut ikiartortalersimassagaluarput, immikkut ittumik isumannaallisaasunit misissuisoqartalerlutik nassatallu tikiffissami aatsaat tiguneqarneqarsinnaaneranik periarfissaq maanna atuuttoq atorunnaassagaluarpoq.
Isumannaallisaanermut piumasaqaatit sukannernerulernissaanik EU-mi oqartussat piumasarineqarsimavoq, tamanna pivoq, EU-mi oqartussasut Billund-imi mittarfimmik misissuineranni, Savalimmiormiut timmisartumik ilaallutik Billund-imut tikittut, nunat EU-mi ilaasortatut naatsorsuunneqarlutik sullinneqarnerat paasineqarmat, tassalu Savalimmiut EU-mi ilaasortaangimmat.
Kalaallit Nunaat EU-mut ilaasortaanngimmat Kastrup-imi isumanaallisaanermut piumasaqaatit Kalaallit Nunaannut atuutsinneqarnissaat EU-mit piumasarineqaleraluarpoq.
EU-p sukannernerusumik isumannaallisaanermut piumasaqaataa piffissaq kingullerpaaq atorlugu Danmark-imi angallannermut aqutsisoqarfimmit pinngitsoortinneqarpoq, tassani EU paasitinneqarluni Kalaallit Nunaat aamma Savalimmiut immikkut ittumik inissisimmata.
Isumannaallisaanermut piumasaqaatit sukannernerulernissaanik EU-p piumasaqaataata atorunnaarsinneqarnissaa inississaaq, EU-mi oqartussaasut nakkutilliisui Kangerlussuarmi aamma Savalimmiuni mittarfik Vágur alakkarteerpassuk .