Ritzau Nunanit allanit

Timmisartoq Moskvami ikuallammat inuit 41-t ajunaartut

Timmisartoq ajornartoorluni Moskvami mittarfimmut mittariaqalermat inuit 41-t ajunaarput, amerlasuullu aqqunartiterlutik. Timmisartumi ikuallattoortoqalermat timmisartoq mittariaqarsimavoq. Annaassiniartartut nutaarsiassaqartitsivimmut Tassimut taama ilisimatitsipput.

Allattoq Ritzau

maajip 05-at 2019 16:33

Nutserisoq Mads Lynge

Timmisartoq 73-inik issimasoqarpoq arfinilinnillu inuttaqarluni.

Annaassiniartartuni tusarfiit ilaata atiminik tunniusserusunngitsup oqaatigaa inuit qulinit amerlanerusut aqqunartitersimasut, ambulancillu ikinnerpaamik qulit ornigussimasut.

Issimasut inuttallu timmisartumit ikuallattumit qimagussorneqareerput. Tusarfiit ilaat nutaarsiassaqartitsivimmut RIA-mut taama ilisimatitsivoq.

Timmisartoq ikuallattoorluni mittariaqalersoq tassaavoq Sukhoj Superjet 100, timmisartuutileqatigiiffiup Aeroflotip timmisartua. Sjeremetjevop timmisartoqarfissuanut mittariaqarsimavoq.

Timmisartup ikuallalluni mikkiartornerata videokkut assilineqarnera Twitterikkut siammarterneqarpoq. Timmisartup tunuatungaata ikuallannera takuneqarsinnaavoq, videoliarli ilumoortuunera uppernarsarneqarsinnaasimanngilaq.

Issimasut inuttallu qimagussorneqartut videoliani allani takuneqarsinnaavoq.

Timmisartup ikuallannera qaminneqareersoq, Danmarkimi nalunaaqutaq unnukkut arfineq qaangilaaraa ilisimatitsissutigineqarpoq. Nutaarsiassaqartitsivik Tass taama allaaserisaqarpoq.

Timmisartup kallermit eqqorneqarluni ikuallalersimasinnaanera tusarfiit ilaata nutaarsiassaqartitsivimmut oqaatigaa.

/ritzau/