Timmiaaqqat Narsarmiutarlu suli matoqqassasut
Nuummi uulluunerani paaqqinniffiit marluk Timmiaaqqat Narsarmiutarlu coronamik tunillatsittoqarneranik ataasinngornermi eqqugaapput.
Paaqqinniffiit tamatuma kingornali matoqqalerput. Taakkulu suli matoqqagallassasut, Kommuneqarfik Sermersooq allappoq.
Timmiaaqqat siusinnerpaamik marlunngorneq septembarip ulluisa 14-ianni ammaqqissinnaavoq.
Sunngiffimmi ornittagaq AKO Narsarmiutaq siusinnerpaamik qaqugu ammarsinnaanersoq nalunarallarpoq.
- Meeqqat sulisullu misissorneqarnerini ornittakkami qanoq tuniluuttoqarsimatiginersoq paasineqarpat ammaaqqinnissaq Nakorsaaneqarfimmit naliliiffigineqassaaq, kommune allappoq.
AAMMA ATUARUK Nuummi tunillatsissimasut amerlangaatsiarput: Ippassarmit 17-it tunillatsissimasut paasineqartut
USK-imi atuartoq sunngiffimmilu ornikkami Narsarmiutamiittartoq tunillatsissimavoq.
USK-imi atuartumik allamik tunillatsissimasumik paasisaqartoqarsimasoq kommuni allappoq. Atuartup atuaqai angerlarsimaannartussanngortinneqarlutillu misissortittussanngortinneqarput.
Tunillatsissimasut nutaat 17-it ippassaq pingasunngornermi paasineqarput.
Tunillatsittunit aqqaneq-marluk meeraapput tallimallu inersimasuullutik. Inersimasut meeqqanut tunillatsissimasunut angajoqqaapput.
Tunillatsissimasut pingasunngornermi paasineqarneratigut tunillatsissimasut katillugit 24-ulerput. Aatsaallu taama amerlatigisut Nuummi tunillatsissimasuullutik.
Nuummi tunillatsissimasut pingasut ataasinngornermi unnukkut paasineqarneranik aallartippoq - Timmiaaqqani tassa ulluunerani paaqqinniffimmiittartoq meeraq ataaseq sulisorlu tunillatsissimasut paasineqarput.