Timimik atueriaatsimik misissuinerit annersaat aallartippoq
Suut timimik aalatitsinermut aalatserusunnginnermulluunniit pissutaasinnaappat? Tamanna Kalaallit Nunaanni timersoqatigiit kattuffiata akissutissarserusuppaa.
Nunatsinni innuttaasut 7.500-ut maanna e-boks atorlugu aperineqarput timimik aalatitsisarneq pillugu misissuinerit maannamut annersaanni peqataarusunnersut ilisimatusaat Kalaallit Nunaanni aalariaatsit aallartimmat.
Kalaallit Nunaanni timersoqatigiit kattuffiat GIF suliniummik aallartitsisuuvoq Syddansk Universitet suleqatigalugu.
- Naak siornatigut innuttaasut peqqissusii timersoriaasiilu pillugit misissuisoqartarsimagaluartoq, taamaattoq ilisimasat suli naammanngillat, ingammik oqaatigisinnaanngussagutsigu sooq innuttaasut ilaat timiminnik aalatitsilluartarnersut ilaallu sooq timiminnik atuerpiarneq ajornersut, GIF-mi suliniutinik ataqatigiissaarisuullunilu aqutsisoq Bjørn Søvsø Jensen oqarpoq.
Misissuinerup aallartinnissaa sioqqullugu GIF sumiiffinni assiinngitsuni innuttaasunik apersuivoq, taakkulu aamma misissuinersuarmut ilanngunneqassapput.
- Misissuineq una aqqutigalugu sukumiisorujussuarmik paasisaqarfigissavarput timimik aalatitsilluartarnitsinnut atuerpiannginnitsinnullu suut peqqutaasarnersut. Timimillu atuinissamut periarfissarititaasut qanoq sunniuteqartigisarnersut, timimillu aallatitsilluassagaanni ulluinnarni inuunermi suut pingaaruteqartarnersut paasiniarneqassapput, Bjørn Søvsø Jensen oqarpoq.
Aningaasat pinnatassat
Apersuinerit aammalu immersugassat atorlugit misissuinerit atorneqassapput Kalaallit Nunaata timimik aallatitsinerpaaffinngornissaata anguniarnerani. GIFip siunnerfigaa tamanna 2030-mi anguneqassasoq.
- Inuit oqaloqatigisarnerini angerlarsimaffiinullu pulaartarnerisigut takusinnaasarparput aalariaatsit assigiinngilluinnartut, peqatigiissuseqartarnerit, timimillu atueriaatsit assiigiinngiiaartorujussuusut, Bjørn Søvsø Jensen oqarpoq.
Misissuinermut inuit peqataanissamut kajumissaarniarlugit pinnatassiisoqarpoq. Peqataasut akornanni makitsinermi 10.000 koruuninik pinnatassaqarpoq.
