Maligassiuisut: Timersortartut ukioq manna akissarsitinneqartut takukkit
Kalaallit Nunaanni Timersoqatigiit Kattuffiata, Elite Sport Greenlandip Peqqissutsimullu naalakkersuisoqarfiup aaqqissugaannik Maligassiuisut show Nuummi arfininngormat ingerlanneqarmat nersornaatit akissarsiallu timersortartunut nunatsinni tamaneersunut tunniunneqarput.
Nersornaatit qulit timersoqatigiiffinnut timersortartunullu ataasiakkaanut tunniunneqarput. Nersornaatit arfineq-marluk: Ukioq manna Timersullammak, Ukioq manna Aqutsisuullammak, Ukioq manna Sungiusaasuullammak, Ukioq manna Timersornikkut takutitsilluarnerpaaq, Atuarfik eqeersimaartoq, Suliffeqarfik eqeersimaartoq, aamma Innuttaasoq eqeersimaartoq.
AAMMA ATUARUK Elite Sport Greenland persuarsiutigineqartumik nersornaasiisussanngortoq
Nersornaatillu nutaat marluk; Ukioq manna Ataatsimoortitsilluarnerpaaq aamma Ukioq manna Piukkunnaatilinnik ineriartortitsisunut nersornaat, kiisalu immikkut nersornaaserneqartoq.
Nersornaammik nutaamik tunineqartup aappaa tassaavoq Aasianni badmintonertartut peqatigiiffiat, Ukioq manna Piukkunnaatilinnik ineriartortitsisunut nersornaammik tunineqartoq.
Utertoq Amassen, nuliani Viktoria Rafaelsen peqatigalugu badmintonertartut peqatigiiffiannik aqutsisuuvoq, nersornaaserneqarnermilu aqaguani KNR-imut ima oqarpoq.
AAMMA ATUARUK Timersornermi maligassiuisut maanna innersuussutigineqarsinnaanngorput
- Nuannaaqaanga tulluusimaaqalungalu. Nassuiarnissaanut oqaasissaaleqisuinnaavunga, Utertoq Amassen oqarpoq.
Badmintonertartut peqatigiiffiat - ukioq manna ukiunik 50-inngortorsiortoq - meeqqanik inuusuttunillu sullissinini pillugu nersornaaserneqarpoq. Nersornaallu timersoqatigiiffiup meeqqanik inuusuttunillu sullissinermini anguniagaanut naapertuuttoq, Utertoq Amassenip oqaatigaa.
- Meeqqani inuusuttunilu pitsaanerit ilaanniissalluta ukioq manna nalliuttorsiornitsinni anguniagaraarput, Utertoq Amassen oqarpoq.
Nersornaatinik legatinillu tunineqartut sinneri.
Kalaallit Nunaanni Timersoqatigiit Kattuffiat, GIF:
Timersullammak: Jens-Frederik Nielsen, badmintonertartoq
Aqutsisuullammak: Johanne Jonathansen, Sisimiuni utoqqaat siusinaartumillu pensionisiallit timersoqatigiiffianni Eqartumi siulittaasoq
Sungiusaasuullammat: David Bror Janussen, futsalimi sungiusaasoq
Ataatsimoortitsilluarnerpaaq: GSS assammik arsartartut
Elite Sport Greenland:
Timersornermi takutitsilluarnerpaaq: Martin Møller, ujakkaartartoq
Piukkunnaatilinnik ineriartortitsisunut nersornaat: Aasiaat Badminton
Peqqissutsimut naalakkersuisoqarfik:
Atuarfik eqeersimaartoq: Oqaatsut Atuarfik
Suliffeqarfik eqeersimaartoq: Qeqqata Kommunia
Innuttaasoq eqeersimaartoq: Anton M. Pedersen, Tour de Nuuk, Sarfaq City Run
Immikkut nersornaaserneqartoq: Kofoed Skole