Timersornermut GU Inatsisartut oqaluuserissavaat
![](/sites/default/files/styles/image_934x467/public/article_images/nina.jpg?itok=RGBJo_f_)
Kattusseqatigiit Partiiata siulitaasuata tullia, Knud Fleischer siunnersuuteqarpoq Ilulissani timersornermut ilinniarnertuunngorfiliortoqarnissaa siunertaralugu Naalakkersuisut misissuinissamut peqquneqassasut, tamannalu Inatsisartunut aalajangiiffigisassanngorlugu siunnersuutigalugu.
- Nunarsuarmioqatitta allat timersornermut ilinniarnertuunngorniarfeqarnerisigut angusarineqartartut pitsaasut eqqarsaatigalugit, isumaqarpugut taamaattoqalernikkut inuusuttatta angusarissaarlutik unammillersinnaanissaat angusinnaallutigu, Knud Fleischer isumaqarpoq.
Kattusseqatigiit Partiiata Inatsisartunit aalajangiiffigisassaatut siunersuutigaa, nunaqarfinni arlalinni aalisakkanik tunisassiorfiit matuinnartartut namminersortunit ingerlanneqalersinnaaneri siunertaralugit, Royal Greenland A/S Namminersorlutillu Oqartussat misissuinissamik peqquneqassasut.
Kattusseqatigiit partiiata siunnersuutit tallimat oqaluuserisassatut nassiuppai, taakkunanngalu ataasiinnaq oqaluuserineqartussaanngitsutut Inatsisartut siulittaasoqarfiannit aalajangiiffigineqarpoq.
Demokraatit oqaluuserisassatut pingaaruteqartutut isigalugu siunnersuutigaat, aatsitassarsiornerup aallartinnerani Nunatsinni suliffeqarfiit nunaqavissunit pigineqartut aatsitassarsiortunut kiffartuussinikkut aningaasarsiornissaat qanoq qulakkeerneqassanersoq Inatsisartuni oqallisigineqassasoq.
- Qanoq ililluta nunaqavissut suliffeqarfiutaasa aatsitassarsiornerup iluani aningaasarsiornissaannut suliassanillu tigooraasinnaanissaannut atatillugu oqallissaarummik siunnersuuteqarpugut, Demokraatit Inatsisartuni ilaasortaatitaat, Andreas Uldum oqarpoq.
Demokraatinit siunnersuutigineqartut ilagaat, angajoqqaarsiat aamma ilaqutariit meeqqanik paarisarialinnik tigummiarsinnaasut ukiuisa killiliiffigineqarnissaat. Taamatut siunnersuuteqartoq, Astrid Rex Fleischer isumaqarpoq taakku 25-inik ukioqalereersimasariaqartut.