GIF sivitsuivoq: Apriilip naaneranut timersortoqassanngilaq
Kalaallit Nunaanni timersoqatigiit kattuffiat inassuteqarpoq timersornermi pisut martsip 31-ta tungaanut unitsikkallarneqassasut. Tamanna pivoq martsip qeqqata nualluussuup coronap nunarsuarmi siaruaakkiartuleruttorfiani. Maannalu taanna innersuussut apriilip naaneranut sivitsorneqartoq, GIF nalunaarpoq.
Kalaallit Nunaanni timersoqatigiit kattuffianni skype aqqutigalugu ataasinngornermi ullaap tungaa ataatsimiittoqarpoq. Timersornermilu pisut uninngatikkallarneqarnerat tassani eqqartorneqarpoq.
AAMMA ATUARUK Tamaat isigalugu: Coronavirus pillugu killiffik
- Aalajangiunneqarpoq timersornermi aaqqissuussat uninngatinnerat apriilip naaneranut sivitsorneqartoq. Arlaatigulli allannguisoqarsinnaanera aamma piareersimaffigineqarpoq, nualluussuarli corona qanoq pisoqarfiunersoq tassani apeqqutaajumaarpoq, GIF-mi allattuuneq Jonas Jensen KNR-mut oqarpoq.
Arctic Winter Games-mut atisat
Timersuutini assigiinngitsuni unammersuarnissat ukiamut kinguartinneqarput. Unammersuarnerit arlallit porskip nalaani pisussaagaluarput. Inuilli katersuussinnaanerat killilersorneqarpoq aammalu ilaasunik angallassinerit uninngatinneqarlutik.
Pissutsilli taamaakkaluartut timersorneq univittariaqanngilaq. Kalaallit Nunaanni timersoqatigiit kattuffiat sapaatip akunnerata naanerani aallartittumik Facebook aqqutigalugu unammisitsivoq.
- Tassani siunertaavoq inuit assinik, videonik oqaluttuanillu nassiussisassasut oqaluttuaralugu angerlarsimaffimmi qanoq timersortarnerlutik timersortarfiit timigissartarfiillu matoqqaneranni. Inuit nassiussisimasut akornanni makitsinikkut Arctic Winter Gamesertoqarnissaraluani atisat atorneqartussaagaluit pinnatassaapput, Jonas Jensen oqarpoq.
Kajumissaarut ilassilluarneqarpoq. Tassami assit 100-ut sinnillit oqaluttuassartallit nassiunneqarput.
- Aatsaavissuaq taamatut unammisitsivugut. Taamaattumik oqaatigiuminaappoq qanoq ilimasuuteqarsimanitta oqaatiginissaa. Taamaattoq angerlarsimaffinni timersorluni nassiussat pitsaalluinnartut nassiunneqartarsimapput, Jonas Jensen oqarpoq.
