Tilluuttartoq: Arnold Schwarzeneggeritut isikkoqalernavianngilatit, kisianni nuannernerpaavoq
Tilluuttartut sapaatip akunnerata naanerani katersuutissapput, nunallu pingasut akornanneersut imminnut unammissallutik.
Nunatsinnit, Rumaniamit Danmarkimiillu tilluuttartut unnugu Fight Nighteqarnerani imminnut unammissapput.
Phillippe Kuitse Andersenilu Nanoq Fight Clubimeersoq unammisussat ilagaat, taannalu unammisussat allat arfinillit sungiusangaatsiarsimallutillu qilanaangaatsiarput.
- Sapaatip akunneranut ullut arfinillit akunnerni marlunni kipissanata sungiusarfigisarpagut, tassa taamaattussaavoq, taanna KNR-ip sungiusarnerani naapikkamiuk oqarpoq.
Nunatsinni tilluuttartut arfineq-marluk
Tilluuttartut arfineq-marluk nunatsinneersut tilluuttartut allat klubbiminneersut peqatigalugit Ukaliusami fitnessimilu sungiusartarput, qanorlu sungiusartarnerat assigiinngitsuusoq, taassuma oqaatigaa.
- Ukaliusami tilluuttartoqatigullu sungiusaraangatta arpannerusarpugut qasujaallisartarlutalu. Fitnessnimiinnitsinni teknikkimut tunnganerusarput, soorlu tilluineq illersornissarlu samminerusarlutigit.
Inuussutissarsiutigalugu tilluuttartut siullerpaamik unammisussaq
Naalli inuuniutiginagu tilluuttartut unammisussat amerlanerpaagaluartut Phillippe Kuitse Andersenip oqarnera naapertorlugu kalaallip tilluuttartup, Frank Madsenip rumaniumiullu Octavian Gratiip unamminissaat unnummi pissanganarnerpaassaaq.
- Unammineq taanna pissangagisorujussuuara, Frank Madsenimi aatsaat siullermeerluni inuussutissarsiutigalugu tilluuttartumut unammisussaavoq.
Phillippe Kuitse Andersenip fight nightimut peqataanissaa pilersaarutaanngikkaluarpoq, taannali 2021-mili aaqqissuussisoqartalermalli peqataasalerpoq, peqataajuaanarlunilu.
- Tilluunneq nuannariuaannarpara, kisianni sanigorusullunga aallartippunga, iluaqutaavorlu. 40 kiilumik oqilivunga, nuannernerpaasorlu paasivara, taanna oqarpoq.
- Arnold Schwarzeneggeritut isikkoqalernavianngilati, kisianni timigissersuaassaatit, tamannalu nuannerpoq. Taavalu aqaguani aatsaat annernartarluni.
Fight Night KNR2-kkut toqqaannartumik unnugu nalunaaqutaq 18.45 aallakaatinneqassaaq.