Tilluuttartoq ajunngilaq

Angut 18-inik ukiulik Qaqortumi tilluuttartut klubbianneersoq ajoquserpoq ambulancenillu Nuummi napparsimmavissuarmut Dronning Ingridip Napparsimmavissualiaanneqarluni.

Tilluuttut unamminerini kingulliit tullianni, unammisut naammassillatsiartullu unammisup aappaa iluaallerpoq, unammineq unereersoq dommerip kina ajugaanersoq taaleraalu unammisoq nunatsinneersoq Islandermiut teqeqquata tungaanut aallaraluariarluni siumut aallariarluni uppittorlu unammisaata akorpaa. Tassanilu isiginnaartut tamarmik pasitsapput arlaannik ajortoqartoq.

Aamma atuaruk Tilluuttartoq Nuummi unamminermi kingorna napparsimmavimmut unitsinneqartoq

Nakorsat qummut qaqipput misissulerlugulu, ingerlaannaq ambulancenut sianertoqaraluartoq isiginnaartuulluni minutsit akunnertut sivisutigisutullusooq misiginarput. Inuppassuit isiginnaartut nipitusimagaluit nipaarupput, allaanngilarlu inuit tamarmik aqqaamasut. Tilluuttartoq 91 kg-tut oqimaatsigisoq akiutinut ikiniarsareriarlugu napparsimmaviliaanneqarpoq.

Ulloq ataaseq affarlu unamminerup kingorna tilluuttartoq pitsanngoriartorpoq.

- Ippassaq (sapaatiummat, aaqq.) alakkaratsigu oqalussinnanngoriikatassimasoq, ajunngilaq.

- Ullumilu maannganngitsiarninni (KNR-imut, aaqq.) alakkarpara, aamma ajunngitsorujussuuvoq. Nammineq issiasinnaanngoreersimavoq nikorfallunilu tandbørsterujoorsimavoq.

- Qasoqqalaaginnarpoq kisianni ajunngilaq ernumananngitsorujussuuvoq, Jørgen Boassen tilluuttunik aaqqissueqataasoq KNR-imut oqarpoq.