Ulloq unnuarlu pisut: Tillinniarsimasorisat marluk kinaassusersineqartut

Politiit paasissutissat nutaat saqqummiunneqarput - 15.30 nutarterpoq

Nuummi Aqqusinersuarmi pisiniarfiup Sparip eqqaani angutinik inuusuttunik pingasunik arpattunik sisamanngornermi ullaakkut takusaqarsimaguit politiit tusarfigerusuppaatsit.

- Sparimit ullaaq nal. 06:19 aamma 06:23 akornanni arpallutik qimaguttunik takunnissimasunik innuttaasunit saaffigineqarusuppugut, Kalaallit Nunaanni Politiini pigaartut pisortaat Jørgen Madsen oqaluttuarpoq.

Erseqqissaatigaali piffissanit taaneqartunit minutsit tallimat sioqqullugit kingornalu sumiiffimmiissimaguit aamma tusarfigerusullutit.

Angutit inuusuttut pingasut politiinit ujaarineqartut pisiniarfimmiissimapput nioqqutissanillu tillissimallutik, sulisut marluk aporaateqatigisimallugit kingornalu sumiiffimmit qimaasimallutik.

Angutit pingasut tigusarinissaannut politiit taamaammat ikioqqupput. Politiit ilisimatitsipput videokkut immiussanik peqarlutik misissueqqinnermi isiginnaagassaminnik sulisullu marluk annertunerusumik ajoqusersimanngitsut.

Politiit imaannamut inuusuttut marluk kinaassusersisimavaat, taakkulu  killisiorneqarumaartut, ualinerani pigaartut pisortaat Ole Hals ilisimatitsivoq.

- Angutit marluk, pisumut attuumassuteqarsorisagut kinaassusersivagut. Kisianni suli sumiinnerat paasinngilarput, Ole Hald oqaluttuarpoq.

Politiinut iluaqutaasinnaasunik paasissutissaateqaruit attavigisinnaavatit uunga 70 14 48.

Paasiniaaneq suli suliarineqarmat, politiit annerusumik oqaaseqarsinnaanngikkallarput.