Tillie: Periusissiaqaraluartoq imminut toqunnissamik sioorasaarisut amerlavallaarput
Kalaallit akornanni imminornissamik eqqarsartut suli amerlavallaartut, Nunatta Politeqarfiata kisitsisaataasa, 2014-miit nalunaarsorneqartalersut takutippaat.
Tamannalu pissutigalugu, Inatsisartunut ilaasortaq, Tillie Martinussen, Demokraatit, Peqqissutsimut Naalakkersuisumut, Doris Jakobsenimut paragraf 37 naapertorlugu arlalinnik apeqquteqaateqarpoq, ilaatigut apeqqutigalugu Naalakkersuisunit takuneqarsinnaanersoq aaqqiissutissanik pisariaqartitsisoqarnersoq imaluuniit imminut toquttarnerup pinaveersaartinneqarnerani pilersaarutit suliniutillu pillugit nukittorsaasoqassanersoq.
Aamma atuaruk Demokraatit: Palasit imminut toquttarnerup pinaveersaartinneranut suleqataasinnaapput
Periusissiap allanngortinneqarnissaa Naalakkersuisunit pisariaqartinneqanngikkallarpoq.
Tillie Martinussenip taama apeqquteqaataanut Peqqissurtsimut Naalakkersuisoq, Doris Jakobsen akivoq allalluni, Naalakkersuisut maannakkuugallartoq imminut toquttarnermik, nuna tamakkerlugu pinaveersaartitsinermut periusissiamik allanngortitsinissamik naleqqusaanissamillu pisariaqartitsineq takusinnaanagu. Taama akinerminut tunngavilersuutigaa, periusissiat atulersinniartarneri piffissamik sivisuumik pilersaarusiortarnermillu sivisuumik atuisarmata.
- Naalakkersuisut piffissamik sivisuumik atuisarneri paasilluarsinnaavara. Tamannarpiarluuna pillugu apeqquteqaatinni siunnersuutingigiga, aaqqiissutaagallartussanik nassaassarsiortoqartariaqartoq, tassami Nunatsinni inuit akornanni imminut toquttarneq atugaavallaaqaaq, Tillie Martinussen oqarpoq.
Aamma atuaruk Palasi ajornartorsiortunut: Ikiuinissamut piareersimavugut
Imminut toqunnissamik sioorasaarinerit suli amerlavallaarput.
Nunatta Politeeqarfiata kisitsisaataat naapertorlugit, 2014-imi imminut toqunnissamik sioorasaarisut 637-upput, ukioq mannalu juulip naanerani kisitsisit suli annertupput tassa imminut toqunnissamik sioorasaarisut 344-it nalunaareeersimasut oqaatigalugu. Politiinit naatsorsuutigineqarpoq, ukioq manna kisitsisit siornamut naleqqiullugit ikinnerunavianngitsut.
Tamannalu Tillie Martinussenip ernumanartoqartippaa.
- Imminut toqunnissamik eqqarsaateqartunut oqarusuppunga, suna tamarmi aaqqiissutissaqartarpoq. Sapaatip akunneri marluk, ukiup affaa ikiorluunniit ataaseq qaangiuppat suna tamarmi allanngorsimassaaq. Aamma taama eqqarsaateqartunut oqarusuppunga kikkut tamaasa tatiginngikkaanni aaqqiissuteqarnissaq tatigineqartariaqarpoq.
Tillie Martinussenip Naalakkersuisumut aamma apeqqutigaa, aaqqiissutissanik suliniutinut suut kalluaasimanersut, tassami imminut toquttarneq pillugu suliniut 2013-imili Inatsisartunit akuerineqareermat.
Oqartussat susassaqarfiillu suleqatigiinnissaaq unamminartuuvoq.
Tamanna pillugu Doris Jakobsen akivoq, pinaveersaartitsinermi periusissiap atuutilersinneqarnissaani susassaqarfiit immikkortortaqarfiillu akimorlugit suleqatigiinnissap pilersinneqarnissaa annerpaamik unamminarsimasoq.
- Taamaattoqarsimappat tamanna politikkikkut aaqqinneqartariaqarpoq. Doris Jakobsenip ersarissumik akinngilaaga unamminartoq pisortat akornnniinnersoq imaluunniit pinaveersaartitsinermik suliaqartuniinnersoq. Taamaattumik ajornartorsiut taakkunaniissimappat taava taakku suleqatigiissinneqarnissaat politikkikkut aaqqinneqartariaqarpoq.
Inatsisartunut ilaasortaq, Tillie Martinussen Demokraatit taama oqarpoq.
Imminut toqunnissannik eqqarsaateqaruit Paarisap nuna tamakkerlugu oqarasuaatikkut siunnersuiffianut Attavik 146-mut akeqanngitsumik sianersinnaavutit.