Palasi ajornartorsiortunut: Ikiuinissamut piareersimavugut

Imminut toquttarnerup pinaveersaartinneqarniarneranut atatillugu Nunatsinni palaseqarfiit atorneqarnerusariaqarnerat, Demokraatit sinnerlugit Inatsisartuni ilaasortap Tillie Martinussenip siunnersuutigaa. Demokraatit sinnerlugit Inatsisartuni ilaasortap taama siunnersuuteqarnera, Palasit Peqatigiiffiannit nuannaarutigineqarpoq:

-  Inatsisartuni ilaasortap tamanna qaqimmagu qujanarpoq. Tassami palasit ajoqillu nipangersimasussaatitaalluinnartumik saaffigineqartarput, Paneeraq Siegstad Munk, Palasit Peqatigiiffianni siulittaasoq oqarpoq, nangillunilu:

- Nipangersimasussaatitaalluinnarnermik neriorsuisimanermi nalunaarusiortussaatitaannginnerput aamma ilaavoq. Tamanna iluatinnartuuvoq, pisortaqarfinnilu inuiaqatigiinni ingerlasuni oqarasuaativut atorlugit oqaloqatigisarpavut. Taamaakkami palasit taamannak pisussaaffilerneqartut, Paneeraq Munk Siegstad erseqqissaavoq.

Aamma atuaruk Nunatsinni pinngitsaaliinerit nunarsuarmi amerlanersaasut

Aamma atuaruk Demokraatit: Palasit imminut toquttarnerup pinaveersaartinneranut suleqataasinnaapput

Imminut toquttarnerup pinaveersaartinniarneqarnerani oqaloqatiginninnerit palasit angerlarsimaffianni pisinnaapput, oqarasuaatitigulluunniit aamma oqaloqatiginnittoqartarluni:

- Ilaatigut nunaqqatiginngikkaluarlugit oqarasuaatikkut angerlarsimaffitsinni oqarasuaativut atorlugit oqaloqatigisarpavut. Taamaakkami palasit illoqartarnerat aamma iluaquteqarpoq tassuuna, Palasit Peqatigiiffiata siulittaasua, Aasianni maanna palasiusoq, oqarpoq.

Aamma atuaruk Politiit ukiumoortumik kisitsisitigut paasissutissaataat nikalluallannartut

- Palasit peqatigiiffiannit  imminut toqunnissamut pinaveersaartitsinermi sutigut erseqqissaasoqarnissaanik misissuinissaq ilalerparput, oqaloqataanissamut piareersimagatta, Palasit Peqatigiiffiat tusagassiuutinut nalunaarummini ilaatigut taama allappoq.