Professorip eqqartuussivilersuunniarnera 19.300 koruuneqartoq
Kommuneqarfik Sermersuup illoqarfiup ineriartortinneqarnissaanut atatillugu tunngavilersuutit eqqunngitsut atorai, Professorip, Ole Helby Petersenip aggustimi oqaatigaa.
- Avataaneersumik aningaasalersuisussarsiornikkut kommunip sanaartornermut missingersuutaani inissaqartitsisoqarnerulernissaa tunngavilersuutaavoq eqqunngitsoq, Sermitsiaq.AG-mut aggustip qaammataani ilaatigut taama oqarpoq.
Tamanna kommunip pingaartumillu kommunip pisortaata, Lars Møller Sørensenip naammaginngilluinnarpaat.
Sermitsiaq.AG-p professori kommunip eqqartuussissuserisuanit eqqartuussivilersuunniarneqarnerminik tigusaqarsimasoq oktobarimi allaaseraa. Eqqartuussivilersuussiniarneq kommunimut 19.300 koruuninik akeqartoq allagaatini KNR-ip pissarsiarisimasaani allassimavoq.
Kommuni naapertorlugu kommunip pisortaa, Lars Møller Sørensen nammineerluni eqqartuussivik aalajangiisinniarsimagaluarpaa, tassani Ole Helby kommunip iliuuseqarnerarneranik kukkusumik tunngavilersuisimaneranik nassuertitsiniaraluarpoq.
Taama iliuuseqarneq ilaatigut tusagassiutinut ilisimaatuumit, Mads Kæmsgaard Eberholstimit Roskildep Universitetianeersumit isornartorsiorneqarpoq.
- Kommunimi suliat pillugit ilisimatuut tusarfiillu allat kommunimut isornartorsiuinerisa tamaasa eqqartuussivilersuunniarneqartassagunik taava ulapittorujussuussapput, Mads Kæmsgaard Eberholst KNR-imut oqarpoq.
Kommuninut ilisimatooq, Roger Buch Danmark Medie. Og Journalisthøjskolimeersup kommunip professorimut eqqartuussivilersuussiniarnerani isumatusaassusaa takujuminaatsippaa.
- Eqqartuussivimmi suliami, ilisimatuup aviisimut oqaaseqarnera innuttaasut soqutigisaannut attuumassuteqarnera takujuminaatseqaara. Taamalu kommunimit pisinnaatitsissutip avataaniissoraara, isumaqanngilanga tamatumunnga aningaasat atorneqassasut, Roger Buch oqarpoq.
AAMMA ATUARUK Sermersooq professorimik eqqartuussivilersuussiniarnini taamaatippaa
AAMMA ATUARUK Inuiaqatigiit soqutigisarineraat qularaara
Kommuneqarfik Sermersooq professorimut eqqartuussivilersuussinermik sukkasuumik taamaatitsiinnarpoq. Naalli borgmesterip, Asii Chemnitz Narupip periutsip ingerlanera isumaqatiginngikkaluarlugu kommunimi pisortani taperserpaa.
- Takusara naapertorlugu Lars Møller Sørensenip kommunimi sulisut tunngavissaqanngitsumik tamanut ammasumik isornartorsiorneqarnertik tunuunnartariaqanngimmassuk akisussaaffik tiguaa, borgmesteri oqarpoq.
AAMMA ATUARUK Asiip eqqartuussivilersuussiniarnerup siunertaa taperseraa
