Ilisimatooq: Inuiaqatigiit soqutigisarineraat qularaara
Kommuneqarfik Sermersuup aningaasaatini eqqartuussivilersuussinernut aamma atortussaanngikkai, aningaasammi inuiaqatigiit soqutigisaannut taamaallaat atorsinnaagai, taanna aamma oqarpoq.
AAMMA ATUARUK Sermersooq professorimik eqqartuussivilersuussiniarnini taamaatippaa
- Inuiaqatigiillu eqqartuussivilersuussiniarneq ilumut soqutigisarineraat oqallisigineqarsinnaavoq, Danmarkimi tusagassiornermik ilinniarfissuarmeersoq Roger Buch oqarpoq.
Aningaasat atuinnarsinnaanngikkaat
Kommunit aningaasat atuarfinnut, paaqqinnittarfinnut, utoqqarnut kommunillu sullissiviinut allanut, tassa inatsisitigut suliakkiissutaareersunut, atortussavai.
Kommunilli inatsisini aalajangigaanngitsunik aningaasartuuteqarunik, taava taakkua kommunip ileqqoreqqusaanik taaneqartartut atorlugit tamakkua matussusersinnaavaat.
Taamaaliussagunilli taamaaliorneq inuiaqatigiit soqutigisarisariaqarpaat:
AAMMA ATUARUK Professori Siorarsiorfik pillugu oqaaseqartoq Sermersuup eqqartuussivilersuukkaa
- Ilisimatuut arlaata aviisimut qanoq oqaaseqarnera inuiaqatigiit sukkut soqutigisarissaneraat takorlooruminaatsittorujussuuara. Tassalu isumaqarpunga kommunit suliassaasa avataaniittoq isumaqarpungalu kommunip aningaasaatini tassunga atorsinnaanngikkai, Roger Buch oqarpoq.
Ole Helby Petersenip eqqartuussivilersuunneqarnissaa nammineq piumasarinikuugini, kommunimi pisortap Lars Møller Sørensenip oqaatigaa.
Politikerit ilisimateqqaarneqanngippata kukkunerusoq
Roger Buchilu naapertorlugu, allaffeqarfiup kommunalbestyrelsi borgmesterilu ilisimateqqaarnagit aalajangiinera ippinnartortaqanngilaq.
Uanili taamaaliorsimanissaq ilisimatuup eqqarsarnartoqartippaa:
- Aalajangiineq immikkuullarissuuvoq, suliamillu taama ittumik eqqartuussivilersuussiniarneq siullerpaajugunarpoq. Eqqartuussivilersuussinermi akisoorujussuusinnaavoq.
Roger Buchip kommunit aqunneqarnerat pillugu inatsit innersuussutigaa, tassani allassimammat, borgmesterip kommunimi ingerlatsineq isumagisassarigaa aammalu akuersissutigineqanngitsunik aningaasartuuteqaranilu isertitaqannginnissaa nakkutigisassaralugu.
AAMMA ATUARUK Professorip eqqartuussivilersuunneqarnera qaqutigoortuuvoq
Tassalu eqqartuussivilersuussiniarnermi politikerit ilisimateqqaarneqarsimanngippata kukkunerusoq, taanna isumaqarpoq. Tassami kommuni eqqartuussivilersuussiisarnissamut aningaasaliisimanisssaa qularutigaaa:
- Taamaammat una kommunip allaffianiit aalajangiiffigiinnaarsinnaasaasa iluaniinngitsoq erseqqippoq. Eqqartuussivimmik suliassiiniaraanni ima ilungersunartigaaq, borgmesterimit immaqalu allaat kommunalbestyrelsimit tamarmiusumit tunuliaqutserneqarnissaq pisariaqarluni, Danmarkimi tusagassiornermik ilinniarfissuarmeersoq Roger Buch oqarpoq.
Kommuneqarfik Sermersuup Roskilde Universitetimi professorimik, Ole Helby Petersenimut, Sermitsiamut aggustimi oqaaserisimasai pillugit eqqartuussivimmi suliassanngortitsinini taamaatippaa. Kommuni KNR-imut allagaqarluni taama nalunaarpoq.
Kommuneqarfik Sermersuumi pisortaq Lars Møller Sørensen KNR-imit oqaaseqartinniaraluarparput iluatsinnaguli.